Fusilatuen hobiak irekitzea denbora kontua da

Atalak: Historia, Politika

Fusilatuen gorpuzkinak (Argazkia: J.U./Argazki Press)

Espainiako Entzutegi Nazionalak geldiarazi egin du gerrako hobietatik gorpuak ateratzeko Baltasar Garzonen agindua. Antza, Zigor Aretoko magistratuek ez dituzte indusketak presazkotzat ikusi eta itzul ezinezko kalteak eragin ditzaketela diote. ARGIAren aste honetako zenbakiak (2.159) artikulua dakar auzi honek sorturiko eztabaida analizatuz.

Artikuluan esaten da fiskaltzaren eta Garzonen arteko borrokatik biktimen duintasuna kaltetua atera litekeela; eta badirudi horrela gertatu dela. Fiskalaren errekurtsoak Entzutegi Nazionaleko kontserbadoreei bidea ireki die epailearen ekimena gelditzeko. Baina espero ez bezala, Garzonek eskumenik ez duela erabaki aurretik –zeren eta hori erabakiko du– geldiarazi ditu hilotzak azaleratzeko lanak magistratuen plenoak. Eta hori sekulako kolpea izan da biktimen senideentzat.

Dena den, erabaki horrek hobi komun batzuei bakarrik eragiten die, beste askotan gorputzak ateratzeko lanek jarraituko dute, ekimen pribatutik bada ere. Euskal Herrian, azkeneko urteetan, dozena bat hobi ireki ditu Aranzadik, erakunde publikoen laguntzarekin edo laguntzarik gabe. Denbora kontua da hobiak irekitzea. Harrigarriena da, Franco hil eta 33 urtera, gaurko biktimen alde hain ozen hitz egiten dutenek horrelako trabak jartzea. Espainiako Gobernuak errespetua eskatzen du erabaki judizialentzat, senideek errespetua eskatzen dute euren senideentzat, horra hor aldea.