Maribi Ugarteburu: “Giro politikoa estutzeko edo lasaitzeko erabiliko gaituzte”

Atalak: Politika

Maribi Ugarteburu (Arg.: Dani Blanco)

Udalbiltzaren kontrako epaiketa bigarren fasean sartuko da datorren astean, hilaren 13, 14 eta 15eko saioekin. Udako etenaldiaren ondoren, gizartearen babesa aktibatzeko hainbat ekitaldi antolatu dituzte, eta hasteko, bihar Donostiako Bulebarrean kontzentratuko dira. Epaiketaren harira, ARGIAn elkarrizketa egin diogu Udalbiltzako kide izateagatik auzipetua dagoen Maribi Ugartebururi.

ETAk “eraso ekintza armaturik” ez egiteko erabakia hartua duela jakin aurretik egin genuen elkarrizketa, baina ez du gaurkotasunik galdu. Hona pasarte bat:

Giro politiko berezian gaude, bake prozesu bat hastear dela dirudi. Itxaropenerako bide ematen al dizue horrek?

Noski. Aurreko auzietan ere oso argi geratu da: sententziak ematen dira egoera politikoaren arabera (…) Oraingo testuingurua hobea da, distenditua delako, baina maltzurra ere bada, Espainiako Estatua ari baita pieza ahulenekin estutzen, presoekin esaterako (…) Gure auziarekin zer egingo duten? Auskalo, estutzeko edo lasaitzeko erabili”

Ugarteburuk dio Udalbiltza auzia xake taulako “peoitxo” bat besterik ez dela. Eta aurrekariak ikusita, ez zaio arrazoirik falta. 2006ko bake prozesua okertzearen ondorioetako bat izan zen Jarrai-Haika-Segi eta 18/98ko auzietan izandako ziaboga manikeoa eta sententzia kondenatorioa.

Joan den astean, ezker abertzaleak eta EAk darabilten gutxieneko baldintzen dokumentua filtratu zuen Vocentok, eta beste gauza batzuen artean, eskubide zibil eta politikoen kontrako “prozesu judizialak” etetea eskatzen dute. Beraz, Udalbiltzaren kontrako sententzia, oraingo prozesuak daraman norabidearen neurgailu izan liteke. Baina hori jakiteko hilabete batzuk beharko dira oraindik.

Bitartean, epaiketak izan dezakeen bilakaerarekin adi egon beharko dugu. Momentuz, Espainiako Gobernuak debekatu egin du Udalbiltzaren Madrilgo babes taldeak datorren astean egitekoa zuen kontzentrazioa –Egunkariaren aldeko ekitaldiarekin ere hala egin zuen–; eta bestetik, Auzitegi Nazionaleko Fiskaltzak Adierazi EH!-ren Bilboko manifestazioa debekatzeko eskatu du, “eskubide guztien alde” deituta egon arren.