Nork esan zuen antinuklearra hilda zegoela?

Atalak: Energia, Gizartea, Historia

Bat baino gehiago harrituta geratuko zen Alemaniako Saxoniako basoetan egunotan ikusten ari garen borrokaren aurrean. Aldaketa klimatikoaren aitzakiapean, erregai fosilen agortzearen akuilupean, nuklearren aldeko jarrera indartzen hasi zela ematen zuen, 70eko mugimenduaren sortzaileetako batzuk ere hasiak ziren balantza nuklearren alde jartzen.

Zapaterok Garoñaren bizitza luzatu zuen iaz, behin betiko itxiera data ere iragarri zuen: 2011. Baina ezer ez da behin betiko, behin betiko egiten den arte.  Luzapenaren kontrako manifestazioa ikusi genuen Gasteizen (4.000 lagun); itxieraren kontrakoa Miranda de Ebron. Ai ama… nuklearren alde manifestatzen! Krisi garaian enplegua garesti dagoela zen bertako langileen argudioa. Lemoizekin ere argudio beretsua erabili zuten batzuek –comeremos berzas– baina hala ere mugimendu sendo eta indartsuak geldiarazi zuen zentzugabekeria –eraikuntza lanak hasi eta gero–. Ez gara lerrootan Lemoizeko zentralaren kontrako borroka zabala errepasatzen hasiko, horretarako www.lemoiz.com webgunea bisitatzea besterik ez dago. Zifra bat bakarrik: 150.000 lagun manifestatu ziren Bilbon 1977ko uztailaren 14an.

Lemoizeko zentralaren kontra 150.000 lagun Bilbon 1977an

33 urte geroago, Espainiako eta Herrialde Katalanetako hainbat udal, hilerri nuklear bat edukitzeko “enkantera” apuntatu dira, Valentziako Zarra herrian jarriko da azkenik eta proiektu horren kontrako protestek apenas dute egunkarietako orritxoren bat edo beste.

Alemanian ere, bertako kantzillerra atrebitu da zentral nuklearren bizi iraupena 12 urtez luzatzera. Alemanian nuklearren kontrako mugimendua munduko indartsuenetakoa izan da, eta bereziki 80ko hamarkadan oso gogor aritu ziren ekologistak hondakin nuklearra garraiatzen zuten konboien kontra –Gorlebenen komuna bat eta guzti sortu zuten–. 2001ean, nuklearrekin amaitzeko berdeen eta sozialdemokraten arteko itunak protestak baretu zituen. Uste zuen, Merkelek, hartza hilda zegoela, baina 2008ko protestek abisatu zioten ez zela horrela, Castor trenak 17 tona hondakin nuklear garraiatu zituen ordukoan eta milaka lagun bildu ziren kontra. Lobby nuklearrek presionatuta-edo “ez dago beste aukerarik” esan du.  Gobernuaren erabakiak alemaniarrak haserretu ditu eta hamarnaka mila lagun manifestatu dira Gorlebenen, bertako basoak okupatu dituzte, errailak atera, trena behin eta berriz gelditzea lortu dute…

Castor tren nukelarraren kontrako protestak Alemaniako Gorlebenen

Merkel kantzillerraren erabakiak haserrea piztu du

Hartza esnatu da eta denborak esango du antinuklearren beste udaberri batean ote gauden. Baina seguru hango eta hemengo agintariek adi-adi segitzen dituztela holako mugimenduak, energiaren gerra gogorra izango delako ekologismoaren lubakian.