Dirua ez da zerutik erortzen

Atalak: Ekonomia, Gizartea, Osasuna

Lazzaroli (EIB), Markel Olano (GFA) eta Carlos Ormazabal (GHP) kredituaren hitzarmena sinatzeko unean

Radio Euskadiko gaur goizeko tertulian hizlarietako batek azpimarratu du behin eta berriz: dirua ez da zerutik erortzen. Hori gogoraraztera joan omen da Angela Merkel Madrilera, espainiarrei (eta euskaldunoi) esan die ezin dela gastatu produzitzen dena baino gehiago. Etxekolan horiek agindu ditu Merkelek, Europako nagusiak. Europako Inbertsio Bankuak (EIB) Zubietako erraustegia finantzatuko duela ere entzun dugu gaur irratian, 195 milioi euroko kreditua emango dio Gipuzkoako Foru Aldundiari.

Aldundiak EIB-ri egindako kreditu eskaera geldirik egon da hilabete askoan,  Greenpeacek txostena bidali ziolako proiektuaren bideragarritasun ekonomikoa zalantzan jarriz. Erraustegiaren errentagarritasun eskasak Gipuzkoako kutxa eta bankuen artean ere errezeloak sortu zituen, eta azkenean Kataluniako La Caixaren eta Banestoren eskutik jasoko dute 68 milioi euroko beste kreditu bat. Guztira 263 milioi euro zorretan.

“Ez dituzte abalak eskatu, baina berme batzuk ezarri dituzte Partzuergoaren aldetik” dio Fernando Segurak, El Diario Vascok erraustegiaz idazteko duen korrespontsalak. Gaurko albistean inork ez du esan zein diren berme horiek, baina DVk –bai, berriz ere Bergarechetarren egunkariak– duela astebete kaleratutako Europa financiará la incineradora artikuluan, xehetasun batzuk aurreratu zituen: bankuekin sinatutako kontratuan garrantzi handia izango dute mankomunitateei (herritarroi) ezarriko zaien tarifek. “Klabea” omen da hori, akaso tarifa horiek negoziatuko dituzte? Horrez gain, entitateok “etengabe” berraztertuko dute finantzazioa eta EIBk Euriborrean oinarritutako interes aldakorra ezarri ahal izango du.

Gaur esan digutena da zorra 21 urtean kitatu behar izango duela Hondakinen Partzuergoak. Zatiketa erraz bat eginez gero, konturatuko gara dozenatik gora milioi euro ordaindu beharko dituztela gipuzkoarrek urtero, hipoteka hori ordaintzeko. Zabalgarbik 2009an 5,5 milioi eurotako ingresoak izan zituen 229.000 tona zabor errez, eta Gipuzkoakoan 213.000 erre behar omen dituzte… Ez da bankaria izan behar ikusteko zerbaitek ez duela koadratzen.

Zubietako erraustegiak bi aukera ditu: edo mankomunitateei zaborra erretzeagatik tarifa desorbitatuak ezartzen dizkie –bankuekin sinatuta duten kontratua mahai gainean jarriz, noski–; edo erre beharreko zabor kopurua ikaragarri igotzen du. Dirua ez da zerutik erortzen, eta Zubietako erraustegiak jadanik baditu etxekolanak egiteko.