Greba goiza Sakanatik
Bideoan, Garikoitz Uharte Sakanako LABeko kideak eskualdeko grebaren balorazioa egin du eguerdian: “Kontuan izan behar da Sakanan bi hilabetean egiten den bigarren Greba Orokorra dela gaurkoa. Egia da greba ez dela orokorra izan baina mobilizazio jendetsuak bere pisua izaten ari dira egun osoan zehar. Irakaskuntzak grebak jarraipen handia izan du eta sektore publikoan ere bai. Gaur borroka eguna izan da Sakanan”.
12:00etan egin den Altsasuko manifestazioa hastear. Ehunka lagun bildu dira eta lehenik zerbitzu sozialak inguratu dituzte. Nafarroako Kutxa ere inguratu eta “ustelkeriari bizkarra” eman diote.
Altsasuko manifestazioaren bideoa, zerbitzu sozialak inguratu dituzten momentua. Manifestazioan Etxeberria harrobiko langileen euren pankarta atera dute. Aurreko egunean Inasan izan ziren elkartasuna adierazten.
11:30ak aldera Irurtzundik Altsasuko Ondarrea industrialdera jo dugu: itxura tamalgarria du, ia dena itxita dago, baina ez greban daudelako. “Gaur nagusiak ariko dira lanean, langileak EREan daude eta” esan du langile ohi batek.
Irurtzunen 10:30etan egin den manifestazioa bideoan. Sakanako arratsaldeko manifestazioa ere Irurtzunen egingo dute, Inasarekin elkartasunean, 18:00etan.
Goizeko lehen orduak Irurtzungo Inasa enpresan. Bertako langileak mintzo dira. Pello Lazkoz (48 urte, 26 Inasan): “Ni Inasan sartu nintzenean ia 1.000 langile ginen. Orain Sakanako egoera beltza da, %30 gaude langabezian” eta Irantzu Olague (33 urte, 12 urte Inasan): “Gainera emakumeontzako lana gutxiago dago eta ez dakigu nola egin gure familia mantentzeko”.
Gorka Oronoz (34 urte, Inasan 4): “Atzo aritu ziren negoziatzen eta badugu itxaropen pixka bat inbertsore berriek enpresa erostekoa. Babes handia jaso dugu Sakana eta Irurtzungo herriarengandik eta asko eskertzen dugu”.
Rosa, Inasa eta Sapa lantegietako sukaldariak hamaiketako goxoa eskaini die borrokan ari diren langileei. euripean igaro dituzte egun hauek “haima” baten azpian eta herritarrek jatekoak eman dizkiete babes gisara. Irurtzunen 2.200 lagun inguru bizi dira eta hamarnaka langabetu gehiago izan ditzake Inasaren itxieraren ondorioz.
Rosak bokadiloak eta kafea eskaintzen dizkie egunero Inasako langileei.
Angel Cuevas (46 urte, 27 Inasan): “Gobernuari eskatzen diogun bakarra denbora da, ez bestelako laguntzarik, inbertsoreek egun enpresaren gidaritza dutenekin negoziatu ahal izan dezaten”.
Fernando Carrión (Inasako LAB)
Info7 irratian Inasako Fernando Carrión (LAB) elkarrizketatu dute (9:00etan). Adierazpen hauek egin ditu: “Herri Harresia sortuz geroztik, aurrerapenen bat egon da negoziaketa prozesuan baina adi egon behar dugu. Etengabeko goardian gaude, makinaria eramanez gero ez dago etorkizunik ez Irurtzunen ez Sakanan. Gogorra egiten ari zaigu, baina hori da dugun itxaropen bakarra. Azkeneraino borrokatuko dugu, herriaren gainetik pasa beharko dute. Egun hauetan saiatu izan dira makinaria eramaten baina geldiarazi ditugu baina ez dakigu noiz arte eutsi ahal izango diogun, badakigulako ondoren indar handiagoak etorriko direla eurei laguntzera”. Nafarroako Gobernuaren parte hartzeaz zera adierazi du: “Ez du ezer egin. Hitz ederrak esan besterik ez, baina horiek haizeak eramaten ditu. Hareago, enpresak Nafarroako Gobernuarekin zorra zeukan, eta akreedoreen konkurtsora atera denean, Gobernuak zorra kobratzeko akordioa lotu du, inpugnatu beharrean. Erabaki dezatela norekin dauden, kapitalarekin edo langileekin. Guk hemen diraugu, eta harro gaude horretaz”.
Makinariari eusteko Herri Harresia, esperantza
Irailean itxi zuten Inasa, 180 langile kaleratuz (aurrez beste 20 kaleratuak zituzten). Lantegiaren jabe den Baikap talde alemaniarrak makinaria saldu nahi du. Inbertsore talde berri bat dago enpresaren jarduera berrabiarazteko interesa agertu duena eta 115 lanpostu sortuko lirateke. Inasako langileek Herri Harresia osatu dute enpresaren aurrean, makinaria eramatea eragozteko.
Inasako albisteak Argian
– Inasako langileak: “Herri harresiarekin amaiera arte jarraituko dugu”
Iruzkinik ez
Trackbacks/Pingbacks