Inasatik makinak ateratzea galarazi du epaileak
Merkataritza arloko epaileak Inasako makinaria lantegitik ateratzeko autoa bertan behera utzi du behin behinean. Nafarroako LABek eman du albistea bere Twitter kontuaren bidez. Ostiralean Inasako langileek helegitea jarri zioten makinaria ateratzeko baimenari, enpresaren egoerarekin –hartzekodunen-konkurtsoan dago– bateragarria ez zelako. Inbertitzaile batek interesa agertu du lantegia erosi eta 115 lanpostu mantentzeko; ostegunean egingo du eskaintza ofiziala.
Lourdes Goicoechea Zubelzu Nafarroako Ekonomia kontseilariak konfirmatu du epaileak makinariaren garraioa geldiarazi duela. Nafarroako Parlamentuan egindako agerraldian azaldu du atzotik zekiela erabakiaren berri. Dena den, epaileak kontseilariari esan dio “ondasun pribatu” batez ari garela eta konkurtso prozedura errespetatu behar dela. “Gure eragiteko gaitasuna oso murritza da” azpimarratu du Goicoecheak: “Makinaria enkantean salduta dago eta erosleak banku kontu batean dirua aurreratuta dauka. Lortu dugun bakarra da makinaria lantegitik atera dadila behin behinean etetea”. Hemen agerraldiaren bideoa:
Inasako langileek borroka gogorra daramate asteotan eta “langile harresia” sortu dute lantegia desmuntatzea oztopatzeko. Hemendik aurrerako negoziazioak aski zailak izango dira, baina itxaropenerako tarte bat sortu da langabeziak zigortutako eskualde horretan.
Iruzkinik ez
Trackbacks/Pingbacks