Zein da Inasako langileen ondasuna?

Atalak: Ekonomia, Gizartea

Inasako langileek mobilizazioekin segiko dutela iragarri dute (Arg.: Argazki Press / Jagoba Manterola)

Inbertitzailea pozik atera zen atzo Nafarroako Gobernuarekin eta Inasako langileekin egindako lehenengo bileratik,  hala adierazi dio astekari honi Fernando Carrion LABeko ordezkariak. Datorren astean berriz bilduko dira proposamen konkretua mahai gainean jartzeko.  

Dena den, ez dirudi egungo nagusi den Baikap-ekin biltzeko modurik izango duenik.  Langileek salatu dute Baikap-ek ez duela inongo asmorik irtenbide bat bilatzeko eta bere helburua dela lantegia ahalik eta azkarren desegitea. Makinaria enpresa ingeles bati saldu eta Inasatik eramaten saiatu dira, baina langileek eragotzi egin dute, merkataritza arloko epaileak salmenta hori behin behinean gerarazi duen arte. Herenegun, epailearen agindua eskuan zutela, makinaria desmuntatzeko lanetan ari ziren ingelesak aterarazi zituzten lantegitik. Hamabost egun arte ez dira itzuliko. Garaipen handia izan da euren enpleguaren defentsan ari direnentzat.

Baina Lourdes Goicoechea Nafarroako Industria sailburuak azaldu du Gobernuaren eragin gaitasuna “oso murritza” dela eta epaileak esan diola “ondasun pribatuaz” ari garela. Hartzekodunen-konkurtsoan dagoen enpresa bat da Inasa, jabeak espekulazio usaina darion operazio bat egin du, lantegia berriz martxan jartzeko interesatu bat dago… Eta makina horiek inork baino hobe ezagutzen dituen langileari “ondasun pribatuaz” hitz egiten zaio.

Herenegun, makinak desmuntatzen ari ziren langile ingelesak aterarazi eta autoa erregistratu zituzten Inasako langileek (arg.: Guaixe)

Inasako langileek ez al dute ba ondasunik enpresa horretan? Lana ez al da ba ondasun bat? 115 lanpostu daude jokoan, basamortu industrial bihurtzen ari den Sakana eskualdean. Baikap-en itxikeria ikusita, Nafarroako Gobernuaren eta konkurtso-administratzaileen ardura da inbertitzaile berriarekin negoziazioa behartu eta Inasa berriz martxan jartzea.

Langileek ondo dakite noren esku dagoen auzia konpontzea eta mobilizazioekin segituko dute. Inasa ondoan kanpatuta segitzen dute momentuz eta ateak hesiekin blokeatuta dituzte. Aurki agerraldi handi bat egingo dute hainbat agente sozialen babesarekin. Eta langileen arteko elkartasunak ez du etenik: atzo Lazaro Etxeberriako langileen ibilaldia Irurtzundik pasa zen.