Muñecas eta frankismoko beste hiru torturatzaile atxilotzeko agindua du Interpolek

Atalak: Politika

Jesus Muñecas domina bat jasotzen 1976an

Argentinako María Servini de Cubria epaileak frankismo garaiko lau torturatzaile atxilotzeko nazioarteko agindua eman du, Celso Galván Abascal Espainiako Errege Etxeko eskolta ohia, Jose Ignacio Giralte González poliziaren komisario ohia, Juan Antonio Gonzalez Pacheco inspektorea –Billy el Niño  izenez ezagun egin zena–, eta Jesus Muñecas Aguilar guardia zibilen kapitain ohia.

Duela gutxi Jesus Muñecas kapitainaren iragan iluna azaltzen duen biografia argitaratu genuen. Besteak beste 1976an Anparo Arangoa leitzarrak jasandako torturen erantzuletzat jo izan da Muñecas.

Arangoaren kasuaz dokumentala ikusi ahal izango da gaurtik aurrera ARGIAren webgunean.

Servini epaileak Muñecasen atxilotzea lehenetsi du 200 orrialdeko txostenean (pdf). 1968an Andoni Arrizabalagari Zarautzen eragindako torturengatik eman du Muñecas atxilotzeko agindua epaileak, Jon Ugutz Arrizabalaga anaiaren testigantza (pdf) aintzat hartuta.

Gerora ere Muñecas beste tortura kasu batzuetan inplikatuta egon zen Tolosan eta Donostian. 1976an Anparo Arangoa leitzarrak jasandako torturen argazkiak ezagun egin zirenean, Tolosako kuarteleko kapitaina tokiz aldatu zuten; hainbat iturriren arabera Jesus Muñecas zen kapitain hori. Garai haietan tolosan lanean zebilen Joaquín Navarro epaileari “gaizkile politikoak gorroto” zituela azaldu zion guardia zibilak.

Anparoa Arangoak jasandako torturen argazkiak ezagutarazi zituen Zeruko ARGIAk 1976an.

Baina tokiz aldatzea ez zion eragotzi gorroto berarekin torturatzen segitzea. Justicia y Paz elkarteak 1977an kaleratutako testigantzetatik iradoki daitekeenez, Donostiako kuartelean izandako tortura kasuetan nahastuta ibili zen. Torturatua izandako Jesus Lasa elizgizonak Muñecas ezagutu zuen: “Sei torturatzaile agertu ziren, Tolosatik lekuz aldaturiko kapitaina buru zutela”.

Justicia y Paz elkartearen torturari buruzko 1977ko txosten batean Muñecas kapitainaren berri ematen da zeharka.

Antonio Tejero koronelarekin batera 1981ean estatu kolpea eman zuen Muñecasek, baina ez zuen denbora gehiegi kartzelan iraun. Geroztik Valdemoron bizi da, egun 75 urte ditu.

Ez dirudi Espainiako Gobernuak estradizio eskaera beteko duenik, Servinik torturen  lekukotasuna jasotzeko jarritako oztopoak ikusita. Hala ere, frankismoko biktimen elkarteak garaipen garrantzitsu gisa hartu dute epailearen erabakia.