Kutxabank: pribatizazioaren kontra bozkatzen dutenei isuna

Atalak: Ekonomia, Gizartea

Ekainaren 30ean BBKn egin behar den batzarrerako  deialdiak ohartarazten du fundazio bihurtzeko prozesuaren kontra bozkatzen dutenek 500.000 euro arteko isuna jaso dezaketela. Hala salatu dute ELAk eta LABek: “Soilik aldeko botoa eman ahal bada, zertarako eman botoa?”.  

“Kontrako botoa ematen dutenei edo boto zuria ematen dutenei edo batzarrean egonda, abstenituko direnei eta baita bertan ez daudenei ere” 500.000 euroko isunarekin “mehatxatu” dituztela azaldu dute ELAk eta LABek, kreditu-erakundeen diziplina legedia erabiliz.  “Xantaia da. Zer irudituko litzaieke parlamentariei soilik hala bozkatu ahal izango balute?” esan du Txiki Muñoz ELAko idazkari nagusiak.

Batzarrean “antidemokratikoa den prozedura” ere erabiliko da sindikatuen esanetan, bozketa bakarrean erabakiko baita dena: banku-fundazio bihurtzea , estatutuak, eta gizarte ekintzarako aurrekontua.

Sindikatuak, BBKn eta Vitalen ekainaren 30ean egin behar dituzten batzarrak inpugnatzeko aukera aztertzen ari dira “praktika mafiosoak” erabili direla argudiatuta.

Batzarra bertan behera uzteko arrazoi nahikoa

Kutxen Legeak dio fundazio bihurtzen ez direnek “falta larria” egingo dutela, kreditu-entitateen diziplina araudiak (LDIEC gaztelerazko hizkitan) hala ezartzen duelako. Honi heldu diote BBKren oharraren egileek batzar nagusiko kide bakoitzari “euren botoekin BBK fundazio bihurtzea eragozten badute” isun kontuekin joateko. Ekai Centerrek balizko isunarena aztertu du. Eta ondorio hauek atera ditu:

• Falta larriaren erantzukizun pertsonala ez dagokie batzar nagusiko kideei, baizik eta BBK-ko administrazaile, zuzendari nagusi, kontseilari delegatu eta halakoei. Hori legeak esplizituki esaten du.
• Batzarrean fundazio bihurtzearen kontrako erabakia hartuko balitz, ez litzateke falta larririk egongo, oraindik ez baita amaitu fundazio bihurtzeko Kutxen Legeak ezarritako urtebeteko epea. Hau da, batzarrak atzera bota dezake fundazio bihurtzeko proiektu zehatza, harekin ados ez badago.
• Ekai Centerren ustez ikaratzeko edo botoa baldintzatzeko informazio faltsua igorri zaie batzarreko kideei. Hori, diziplina araudiak falta larritzat jotzen du, eta ardura penala ere badu, urte bete arteko kartzela zigorra.
• Batzarreko kideen botoa baldintzatzeko informazio nabarmenki faltsua erabiltzen bada, batzarra bertan behera geratu beharko litzateke.

Ekai Centerren ustez, BBKren oharraren egileak badaki batzarreko kideei ezin zaiela isuna jarri, baina hala ere, egileak esaten du “seguruenik” Espainiako Bankuak batzarreko kideak zigortuko lituzkeela.