Ekonomia kolaboratiboaren abaraska

Atalak: Ekonomia

Konpartitzea oinarri duen kontsumo ereduak boom egin duen honetan, Jeremiah Owyang analistak ekonomia horretan dabiltzan enpresen “abaraska” eguneratu du. Gela berean ikus ditzakegu nola konpainia biliodunak, hala onura soziala bilatzen duten ekimenak. Eztabaida zabalik dago.

Etxeko logela, autoa, jakintza, aurrezkia, ortua… Gure eskuetan askotan soberan ditugun ondasun eta zerbitzuak besteekin konpartitzeko ideia da kontsumo kolaboratiboa, eta azkenaldian teknologia berriak izan ohi dira hura bideratzeko tresna.

Terminoa 2007an agertu zen lehen aldiz, baina 2010 urtetik hasi zen hedatzen eta orduz geroztik sekulako gorakada izan du eredu horretan oinarritutako ekonomiak, seguruenik krisiak eraginda. Forbes aldizkariaren arabera, 3.500 milioi dolarreko irabaziak izan dituzte kontsumo kolaboratiboarekin zerikusia omen duten plataforma digitalek.

Bartzelonan eta Madrilen taxisten artean hainbesteko zalaparta sortu duen partikularrek autoak erabiltzeko Uber enpresa dugu hauetako bat. San Frantziskon sortutako aplikazioa mundu osora zabaldu da eta 40.000 milioi euro balio ditu; burtsan kotizatzen ez duen enpresa aberatsena da jadanik.

Zerbitzuetako sektore tradizionalak kexa dira, halako konpainiek lehia desleiala egiten dutelako (zergarik ordaindu ez, segurtasun falta…). Bestalde, askoren ustez lana are prekarioago bihurtuko dute, nagusia “algoritmo bat” delako. Muturreko kapitalismora daramala alegia.

Baina ekonomia kolaboratibotik bertatik ere kritika etorri zaie. Balioak kontuan eduki beharrean (zentzuz kontsumitu, elkartrukea…) aberastea baino beste helbururik ez dutela egozten diete eta eredutik kanpo daudela.

Aldiz, onura soziala bailatzen duten eta komunitateak sortzen duen konfiantzan oinarritzen diren bestelako proiektu kolaboratiboak ugari dira, terminoa asmatu aurretik ere existitzen zelako gure artean. Orain, internet sartu da tartean, horrek dituen zabalpenerako aukera eta arriskuekin.

Abiadura itzela hartu du gaiak, arlo bakoitzak badu bere izena: coworking, car-sharing, couchsurfing, crowdfunding… Liburuak argitaratu dira, hitzaldiak eman, webguneak zabaldu… Patxadazko eztabaidarako betarik apenas egon da, baina etorriko da hori ere, ekonomia kolaboratiboaren barruan dauden barne korronte arras ezberdinek talka egingo baitute berandu baino lehen.

————————————–

Ekonomia kolaboratiboari buruzko Compartirmola.com dokumentala kaleratu dute, hain justu modu konpartituan, eredu horretan dabiltzan korronte ezberdinetako eragileek: