EBk 2018a “Ekonomia Sozial Eraldatzailearen urtea” izendatzeko ekimena abiatu dute

Atalak: Ekonomia

Ekonomia solidario edo eraldatzailean ari diren eragile eta alderdiek Europan beste paradigma ekonomiko bat sortzeko lehen pausotzat jo dute ostegunean Bruselan egindako foroa.

Europako Parlamentuan egun osoz egin ziren ostegunean konferentzia eta tailerrak, Ekonomia Sozial Eraldatzailearen Europako I. Foroan. Gaien ugaritasunak eta helburuen zehaztapen faltak zaildu egin du foro horretatik ondorio garbirik ateratzea. Nolanahi ere, “oraindik asko emateko duen bidean geltoki bat” baino ez da izan, Tania Gonzalez Podemoseko europarlamentariak amaierako hitzaldian esan zuzenez.

Epe ertainean landu beharreko zenbait ildo azpimarratu eta ekonomia sozial eraldatzaileak dituen hainbat erronka identifikatu dituzte 15 herrialdetako 200 partaidetik gora izan diren ekitaldian.

Sinn Féineko Lynn Boylanek abian jarri duten ekimen zehatz baten berri eman zuen: Europar Batasunean 2018 urtea “Ekonomia Sozial Eraldatzailearen urtea” izendatzeko babesak lortu nahi dituzte. Ideia Challeging of crisis (krisiari aurre egiten) taldetik sortu da –bertan biltzen dira Europan murrizketa sakonak jasan dituzten hainbat herrialdetako hezkuntza eragileak– , eta idatzi bat adostu dute Europako Batzordeari eskatuz konpromisoa ager dezala ekonomia sozial eta eraldatzailearekiko, eta Europar Batasuneko estatuak bidera ditzala horretara.

Boylanen esanetan urratsak eman nahi dituzte ekonomia eredu hori EBko politiken barruan sar dadin eta 2018a “Ekonomia Sozial Eraldatzailearen urtea” izendatzearekin hasi nahi dute: “Horrela behartuko ditugu estatuak euren egiturak aldatzen has daitezen eta gauza konkretuak proposatu ditzaten”.

Closing remarks of #EFSSE16 with @LNBDublin @TaniaGonzalezPs and MC Vergiat. pic.twitter.com/vTBmwaLkge

— EFSSE 2016 (@efsse_) January 28, 2016

Europako zerbitzu publikoen behategia sortzeko proposamena ere aintzat hartu da foro horretan, baita herritarrek sorturiko berezko finantzazio tresnetan eta “kreditu eskubidean” sakondu beharra ere, Jason Nardi italiarrak azaldu moduan. Finantzazio etikoaren arloan, Tesalonikako proiektuak bidea urra dezakeela ere azaldu dute.

Bestalde, Europar Batasunean zabaldutako hainbat kontzepturen atzean egon daitezkeen arriskuak nabarmendu dituzte foroan. Hala, nahasmena sor liteke “ekintzailetasun sozial” edo “enpresa sozial” terminoekin, egungo eredu ekonomiko neoliberalaren esparrura eramanez gero.

Ondorio orokorrik eduki ez arren, ekonomia sozial eraldatzaileko ekimenak saretzen joateko baliagarritzat izan dute foroa bertan parte hartutakoek eta Marie-Christine Vergiat frantziar politikari feministak azken hitzetan esan bezala, “egungo utopia biharko errealitate” bihurtzeko lanean segitu behar dela izan da konklusio nagusia.