Martin Garitano: “Kutxaren akzioak udalen eta Gipuzkoako Aldundiaren artean banatzea da gure proposamena”

Atalak: Ekonomia, Gizartea, Uncategorized

Kutxak ez luke banku fundazio bihurtu behar izango Kutxabanken duen partizipazioa murriztuz gero. Proposamena (pdf) txosten juridiko batean oinarritu du Gipuzkoako Aldundiak eta Kutxaren batzar orokorrean aurkeztuko du, onartuko den “esperantzaz”.

Donostiako Miramar Jauregian Gipuzkoako Aldundiko ordezkari ugari, EH Bilduko karguak eta Kutxaren batzar orokorreko kideak izan dira foru erakundeak Kutxaren etorkizunaz mahairatu duen proposamena entzuteko.  Xehetasun guztiak azaldu dituzte Martin Garitano ahaldun nagusiak, Helena Franco Ogasun eta Finantza diputatuak eta txostena egin duen talde juridikoko Xabier Barinagarrementeriak.

Nola banatuko dituzte akzioak?

Kutxak %32ko partaidetza dauka Kutxabanken; %5era jaitsiz gero ez luke banku fundazio bihurtu behar izango, ohiko fundazio baizik, eta Helena Francoren esanetan legea askoz malguagoa da ohiko fundazioen kasuan. Modu horretan, Kutxaren egungo ordezkaritza eta gobernu organoak mantendu ahal izango lirateke eta kontrol publikoa eta soziala bermatu: “Ez dago legerik ez araurik Kutxaren akzioak erakundeen esku jartzea eragozten duenik” esan du Francok.

Kutxak Kutxabanken dituen 640.000 akzioak modu honetan banatuko litzateke aldundiaren proposamenaren arabera: Kutxak eta erakunde fundatzaileek (Gipuzkoako Aldundia eta Donostiako Udala) akzioen %4,998 izango lukete, Gipuzkoako gainerako udalek %17. Udalen artean akzioen zati txiki bat modu linealean banatuko litzateke “denen partaidetza bermatzeko” eta gainerakoa biztanleriaren arabera.

Kutxak akzioak dohaintzan emango lituzke eta erakunde publikoek Kutxabankeko irabaziak Kutxa fundazioari itzuliko lizkiokete, honek gizarte ekintzarako erabili ditzan. “Badago alternatiba, berme juridikoak betetzen ditu eta egingarria da”, amaitu du Francok.

Martin Garitanoren esanetan proposamenak Araba eta Bizkairako ere balio du eta gisa horretara Kutxabankeko kontrol publikoa ere bermatu daiteke.

Denbora gutxi, beraz, abiadura handia

Aldundiaren asmoa da proposamena Kutxaren batzar orokorrera eramatea, bertan onartu dezaten. Indarrak oso orekatuta daude Kutxan eta ikusi beharko da zenbait talderen jarrera aldatzen ote den, foru erkaundeak bankarizazioaren alternatiba mahai gainean jarri ondoren. Seguruenik, CCOOren ordezkariarengana zuzenduko dira begirada guztiak, bere botoa giltzarri suerta liteke-eta.

Baina Kutxako zuzendaritza, etorkizuneko banku fundazioaren estatutu berrien zirriborro negoziatzen ari da jadanik, eta balizko patronoen aukeraketa prozesua ere martxan da; datorren astean bilduko dira Batzar Nagusiak erabaki batzuk hartzeko. Aldundiko iturriek azaldu dutenez euren nahia da prozesu hori etetea eta ponentzia bat sortzea proposamen berria aztertzeko.

Saiakera horretan hilabete gutxi batzuetako epea dago baina, legeak urte amaierarako banku fundazio bihurtzea derrigortzen baititu aurrezki kutxak. Udako tregoa txikiaren ondoren, beraz, Kutxabanken auziak abiadura handia hartuko du berriz ere.