Kutxa banku fundazio bihurtzeko beste pauso bat

Atalak: Ekonomia, Gizartea, Uncategorized

Martin Garitano Gipuzkoako ahaldun nagusia, Ainhoa Beola Bilduk Kutxan duen kontseilaria eta Xabier Barinagarrementeria aldundiko talde juridikoko kidea, irailaren 22an Xabier Iturbe Kutxako presidentearekin egindako bilerara bidean (arg.: Eitb.com)

Gipuzkoako Foru Aldundiaren proposamenari atea itxi ala ez erabakiko du gaur Kutxaren administrazio kontseiluak. Pribatizazioaren kontrako plataformak giza katea egingo du Donostian.

Urrian egingo den Kutxaren batzar orokorrerako gai-zerrenda zehaztuko du administrazio kontseiluak; itxura guztien arabera banku fundazio bihurtzeko estatutu berriak onartu eta patronoak izendatuko dituzte batzar horretan. Aldundiak eskatu du bere proposamena ere gai-zerrendan sartzeko.

Martin Garitano Gipuzkoako ahaldun nagusiak Kutxaren zuzendaritza aurrean azaldu zuen bere proposamena, Xabier Barinagarrementeria abokatuak lagunduta. Kutxak erakunde publikoei Kutxabanken dituen akzioak emanez gero, ez luke banku fundazio bihurtu behar izango eta egungo “kontrol publiko eta soziala” mantenduko litzateke.

EAJ, PSE eta PPk lehen momentutik arbuiatu dute aldundiaren egitasmoa, “arduragabea” eta “ilegala” dela esanez. Gipuzkoako Foru Aldundiaren esanetan baina, Xabier Iturbe Kutxako presidentearen talde juridikoak onartu du “legala” dela:

#Kutxa.ren kontrol publikoa bermatzeko Aldundiaren proposamena legezkoa dela onartu du Xabier Iturbe lehendakariaren talde juridikoak

— Gipuzkoa Berria (@GFA_berri) September 23, 2014

CCOOren abstentzioa ikusgai

Administrazio kontseilua 14 kidek osatzen dute –DYAren ordezkariak bere karguari uko egin zion–. Horietako 7 Bilduren ildokoak dira eta gainerakoak EAJ, PSE, CCOO eta Pixkanaka plataformakoak. Berdinketaren aurrean, Xabier Iturbe presidenteak (EAJ) kalitate-botoa erabil dezake.

Ikusteke dago CCOO sindikatuak zer egiten duen, orain arteko bere jarrera banku fundazio bihurtzeko prozesua babestea izan baita. Joan den astean, etorkizuneko banku fundazioaren balizko patronoa aukeratu zuten sindikatuek –CCOO eta Pixkanakaren botoekin–, ELAk eta LABek uko egin zioten aukeratzeari. Noticias de Gipuzkoak argitaratu duenez, CCOOk abstenitzeko asmoa du administrazio kontseiluan. Egitasmoa “berandu” datorrela eta “hutsuneak” dituela dio zentral sindikalak baina hala ere batzar orokorrean eztabaidatu beharko litzatekeela.

Errenteriako kanpaldia Kutxaren aurrean (arg: @anasonidosypala)

Giza katea Donostian

Kutxabanken pribatizazioaren kontrako plataformak deituta giza katea egingo dute gaur, goizeko 11:00etan hasita Donostian, udaletxetik Kutxak Garibai kalean duen egoitzaraino. Arratsaldeko 16:00etan berriz Garibai kalean kontzentrazioa egingo dute IRPH Stop Gipuzkoa eta Kaleratzeak Stop plataformek.

Errenterian, hainbat lagunek akanpatuta igaro dute gaua Kutxaren sukurtsal aurrean, Kutxabankek egin nahi duen etxegabetze batengatik protestan.