Zergatik egin du porrot greba orokorraren aukerak?

Atalak: Ekonomia, Gizartea

2020ko urtarrilaren 30eko greba orokorreko manifestazioa (argazkia: Amaia Lekunberri / ARGIA)

Euskal Herrian greba orokor bat antolatzeko aukera mahai gainean izan da behin eta berriz azken hilabeteotan sindikatuen artean. LABek mahairatu zuen lehen aldiz Maiatzaren Leheneko ekitaldietan halako mobilizazio bat egiteko beharra, eta ELAk ez zuen ezezkorik esan. Arrazoiak soberan daude bi euskal sindikatu nagusientzat: pandemiaren ondorioz hartutako neurri ekonomiko eta sozialei buelta emateko premia, zerbitzu publikoak indartzea, Espainiako lan eta pentsio erreformen torlojua askatzeko ahalegina, Europako funtsen itzala…  Baina greba egiteko unean eta estrategian huts egin du elkarlanak.

LABek azaldu duenez, bere asmoa deialdia lehenbailehen egitea zen, Euskal Herriko eragin-eremuan kokaturik “bide propioa” hartuta, eta  sindikatu honen arabera ELA data hori atzeratzen joan da “Madrilgo jokalekura eta agendara” begira egon delako “une egokienaren zain”. ELAren esanetan, ordea,LABek uko egin dio grebari, eta “akatsa” deritzo horri, “orain Madrilen dauden euskal alderdiak, EAJ eta EH Bildu, presionatzea dagokigulako”, azaldu du Mitxel Lakuntza ELAko idazkari nagusiak.

ELAren kritika ez da LABengana soilik zuzendu. Lakuntzak oso gogor hitz egin du EH Bilduk espainiar aurrekontuak babestearen aurka, “EAJren eredu ekonomiko eta soziala onartu duelako”. Hala, iradoki duenez, Espainiako Kongresuan datorren urtean onartu nahi den lan erreformarekin EAJk eta EH Bilduk hartuko duten jarreraren aurrean adi egon beharko lukete euskal sindikatuek, eta greba orokorra momentu horretan egin.

Hori litzateke ELAk hilabete guztiotan bilatu duen “une egokia” –LABen hitzak erabiliz–. Baina, akaso une egokirik behar ote du greba orokor batek? Euskal Herrian deitu zen azken lanuzte handia 2020ko urtarrilaren 30ekoa izan zen, eta orduan patronalak eta erakundeetan agintzen dutenek grebarako “nahikoa arrazoi” ez zegoela adierazi zuten, ohi duten bezala. Baina egin, egin zen, prekarietatea, soldata arrakala eta pobreziaren kontra “estutzeko garaia” zela ikusi zelako sindikalgintzatik.

Duela urtebete argitaratu zen EHUko ekonomialarien ikerketa batek ondorioztatu zuen greba tresna ezinbestekoa dela “kontraboterean” dauden ELA, LAB eta antzeko sindikatuentzako; mobilizazio soila baino, langileen ahalduntzea eta “antolaketa sakonagoa” ekartzen duelako, eta sindikatuak indartzen dituelako –ikerketa horren arabera, grebak egiten Europako txapeldunak gara–. Horri heldu beharko diote bi sindikatuek bai ala bai, lehenago edo beranduago.