Amazonen opari bat

Atalak: Ekonomia, Energia, Ingurumena

Amazon Web Servicesen poligono erraldoietako bat Aragoin. Argazkia: el Burgo de Ebroko Udala

Amazonek, Jeff Bezos magnatearen konpainia estatubatuar erraldoiak, dirutza gastatuko du Aragoin dituen hiru datu-zentroak handitzeko. Bere filial Amazon Web Servicesek (AWS) 15.700 milioi euro jarriko ditu Huescan eta Zaragozan, Pirinioetatik datorren Gállego ibaiaren inguruan dituen “laino” edo cloud azpiegituren tamaina sei aldiz biderkatzeko. Munduko gune handienetako bat sortuko dute Erriberatik apenas ehun kilometrora.

Internet bidezko denda global hegemonikoaren txanponaren beste aldea dira datu-zentroak, birtualetik gutxi dutenak. Milaka milioi klik elikatzeko, sekulako energia kopurua behar dute: Aragoikoek bakarrik, 300.000 pertsonako hiri batek bezain beste elektrizitate, 300 megawatt. Gainera, datu-zentro horiek hozteko ur kontsumoa ere izugarria da, batez beste 25 milioi litro ur urtean, Tu nube seca mi río (Zure lainoak nire ibaia lehortzen du) kolektiboak gogorarazi duen moduan, hiri handi bateko biztanleen beharrak asetzeko adina. Aragoin, horretarako, Villanueva de Gállego herrian ur-depositu handi bat eraikiko dute, beretzako propio egindako hodi bati zuzenean lotua, ibaitik ura ateratzeko.

Baina AWSk nahiago izan ditu bestelako datu batzuk nabarmendu proiektuaren aurkezpenean: 17.500 enplegu sortuko dituela, 5.000 arbola jarri dituela Zaragozan, eskoletan kanpainak egingo dituela, eta 2030 urterako “gastatzen duena baino ur gehiago itzuliko” duela, horretarako hoditerian sentsoreak jarri eta hidrografian hobekuntzak eginda. Dena teknologia berrienez, “think big” eta “high tech”. Gainera, multinazionalak ziurtatu du elektrizitatearen %100 berriztagarrietatik lortuko duela 2025 urtean.

Horren barruan kokatu dezakegu Aragoiko operazioa iragarri bezperan AWSk zabaldutako beste albiste bat: Nafarroan “eskala handiko” bi zentral fotovoltaiko eraiki nahi ditu, biek batera 72 megawatteko potentzia izango luketenak. Bezosen enpresak ez du zehaztu Nafarroako zein tokitan jarri nahi dituen poligono horiek, baina Espainiako Estatuan eraiki nahi dituen hamabi proiektuen barruan daude, denera 2,9 gigawatt ekoizteko gaitasuna edukitzeko.

Greenwashing kanpainak gorabehera, Amazon eta beste lau konpainia teknologiko handienak (Meta, Alphabet, Apple eta Microsoft) munduko karbono isurien %2 eta %3aren atzean daude, Globak Action Plan GKEak berriki egindako ikerketa baten arabera, besteak beste hiperkontsumoa bultzatzen dutelako. Kontsumo eredu jasangaitza, klima aldaketa, idortea eta kolonizazio energetikoa opari ekarriko dizkigu beraz Amazonek, paper orlegitan eder bilduta.