Starring… Auzitegi Nazionala

2012-09-19  //  Politika  //  Iruzkinik ez

Hernaniar gazteak Madrilen, epaiketa hasi aurretik (Arg.: HGA)

Pablo Ruz epaileak Hernaniko hamar gazteren kontra idatzitako auzipetze autoa (pdf) eskuetan hartzen baduzu, telesail errepikakor batek aspertuko zaitu. Gidoi hori egitea ez da zaila: lehenik, aipatu erregistroetan aurkitutako kamisetak, pinak, etxafuegoak, paskinak –ez ahaztu Txalapartako liburuak– eta abar. Aukeran, “kaptazio” hitza erabiltzeak asko janzten du gidoia. Horri gehitu Gazte Asanblada arriskutsu bat, AHT gisako sigla erakargarriren bat, eta zer arraio!, 1990eko hamarkadako “Y” famosoa ere bai, kutsu retro bat emango dio-eta. Elementu inportanteena, trama guztia askatuko duena, amaierarako utzi: auto-inkulpazioak.

Edozein izan daiteke gaur egun Auzitegi Nazionaleko gidoilari. (gehiago…)

1936ko fusilatzeen froga grafikoa

2012-09-13  //  Gizartea, Historia  //  Iruzkinik ez

1954an ateratako irudi honetan oraindik Hernaniko hilerriko hobi komunaren arrastoa ikus daiteke. Orban zuriak adierazten du lurra nahastuta dagoela.

Ez da Robert Caparen foto ezezagun bat, ezta Ferroleko artxibo militarrean gordeta zegoen dokumentu ezkutua ere. Baina askorentzat esanahi handia izango du. 1954an aireplanotik ateratako irudi honetan orban zuri lotsagarria ageri da Hernaniko hilerriaren bazterrean. Sendatu gabeko zauria. 1936ko iraila eta azaroa artean hortxe ehortzi zituzten 200 lagun ingururen hilotzak, frankistek beruna eman ondoren. Hura bizi izan zutenen memoria gero eta lausoago iristen zaigun honetan, gertaera haiek berreraikitzeko Rubiken kubo ezinezkoak egin behar ditugunean, halako pieza solteek nolabaiteko zirrara sortzen digute gerrako biloboi. (gehiago…)

Dinamita gehiago Okzitaniako Tolosan

2012-08-31  //  Energia, Gizartea, Nazioartea  //  Iruzkinik ez

2001eko irailaren 21ean sekulako leherketa izan zen Okzitaniako Tolosan. Geroztik konspirazio teoria ugari izan da.

Okzitaniako Tolosako AZF enpresan 2001ean gertatutako leherketaz ikerketa baten berri eman du Sud Ouest egunkariak. Ikerketaren emaitzek hankaz gora jartzen dute orain arteko bertsio ofiziala, istripu kimikoa izan zela dioena. Laurent Jacob ingeniariaren ikertaldeak dio ondoko enpresan izandako isuri batek sortu zuela leherketa-katea. Zergatik sortu zen ordea isuria? Galdera horri ezin diotela erantzun diote, atentatuaren hipotesiari berriz ere atea irekiz. (gehiago…)

Castilblanco basatia

2012-08-24  //  Ekonomia, Gizartea, Historia  //  Iruzkinik ez

Castilblanco-ko alkatea, inguruan guardia zibilak eta kazetariak dituela. 1931ko gertaeren ondoren ateratako argazkia.

Extremadurako Castilblancon, gure abuelok eta abuelak lan egin zuten herrian, lau guardia zibil hil zituzten 1931ko urtezaharrean. Alkateak guardia zibilei agindu omen zien manifestazio bat eragozteko eta halako batean pertsona bat hil zuten tiroz. Herritarrek, asaldatuta, guardia zibilen kontra egin zuten matxeteak, labanak eta harriak erabiliz. Matrailezurrak hautsi zizkieten, begiak atera, inguruan dantza egin zuten… Amorru kolektibo baten pean aritu ziren. Castilblancoko Gertaerak deitu izan zaio geroztik triskantzari. (gehiago…)

Gestio planik gabe, Jaizkibelek zer etorkizun?

2012-07-10  //  Azpiegiturak, Ingurumena  //  Iruzkinik ez

Natura 2000 Sareko gestio plana onartzeko legezko epea agortu da jadanik (Arg.: Jaizkibel Bizirik)

Zortzi urte dira Jaizkibel eta Uliako labarrak Europako Natura 2000 Sarean sartu zituztela. Europar Batasunean mehatxatuta dauden espezieak eta habitatak epe luzera babesteko tresna nagusiena da sare hori –Jaizkibelgo itsasertzak 15 kilometroko luzeera du eta euskal kostaldeko eremu birjin handiena da–. Izendapenak baina, ez du ziurtatzen helburuak betetzea, beharrezko neurriak ez badira aplikatzen.

Jaizkibel-Uliak urteak daramatza gestio planik gabe, eta dirudienez, horren eskumena duen Eusko Jaurlaritzak ez du aurreikusten plana onartzeko data zehatzik. Halaxe salatu du Jaizkibel Bizirik taldeak. Eusko Legebiltzarraren bidez egindako galderari Ingurumen Sailak zera erantzun dio: “Alegazio txostena amaitzeko eperik ez da ezarri, baita agiriak aztertu eta aldatzeko ere”.

Denbora luzez dokumentua Eusko Jaurlaritzako “tiraderaren batean” gordeta egon eta gero –Leire Beteta ingurumen teknikariak ARGIAri azaldu zion gisan–, planak blokaturik segitzen du. 2012ko urtarrilean esposizio publikoan jarri zen eta 118 alegazio jaso ditu. Jaizkibel Biziriken esanetan, alegazioa aurkeztu dutenen zerrenda begiratzea nahikoa da “lobby anti-Jaizkibel” bat sortu dela ikusteko. (gehiago…)

Ez hain berde, ez hain garbi

2012-07-04  //  Azpiegiturak, Gizartea, Ingurumena  //  Iruzkinik ez

FCCk eskua barruraino sartu du 'Green Capital' delakoan

Gasteizko zabor bilketaren inguruko ustelkeria kasu baten berri eman digu egunotan PRISA taldeko El País egunkariak. FCC enpresak PPko zinegotzi ohi baten zerbitzuak erabili ditu Gasteizko Udaleko kontratu ugari lortzeko. José Antonio Pizarrok 2004an utzi zion zinegotzi izateari eta berehalakoan aholkularitza enpresa bat sortu zuen. Geroztik urteak daramatza FCCri eskainitako zerbitzuengatik dirua kobratzen “hilabetero 18.000 euro” El Paísek dioenez. Urte horietan, FCCk milioika euroko kontratuak lortu ditu, tartean hiriburu “berdeko” kaleak garbi mantentzea, urtean 25 milioi euroren truke. (gehiago…)

Bilduren “zabortegiak”

2012-06-07  //  Azpiegiturak, Energia, Gizartea  //  Iruzkinik ez

“Zabortegi batzuk itxi eta besteak irekiko dituzte” zioten oposizioko twittek eta retwittek behin eta berriz. Eguna bizi-bizi joan zen hondakinen inguruan engaiatuta dauden guztientzat. Gipuzkoako Foru Aldundiak hondakinen planaren garapen berria (pdf) aurkeztu zuen eta 2020 arteko helburuak zehaztu zituen: %75eko birziklapen tasa, Lapatx, Sasieta eta Urteta zabortegiak ixtea, sei konpostaje planta berri, errauskailurik ez, erreusa 206.000 tonatik 77.000 tonara murriztea… Bi dohain handi ditu egitasmo berriak: hondakinak jatorrian bereiztea lehenesten duela (atez atekoa, autokonposta eta dena delakoen bidez) eta hurbiltasun printzipioan oinarritutako sare-deszentralizatu bat eraikiko dela. Lortuz gero, gipuzkoar guztiak zoriontzekoa litzateke. (gehiago…)

George, hain ona al dago?

2012-05-23  //  Gizartea, Ingurumena  //  2 iruzkin

Marketin operazio borobila egin du Nespressok. Baina zeinek/zerk ordainduko du?

Kafe kapsulatxoak birziklatzeko hitzarmena sinatu dute Garbikerrek –Bizkaiko hondakinen kudeaketaz arduratzen den elkarte publikoak– eta Nestlék. Garbiguneetan eta puntu berde mugikorretan bilduko dituzte kapsulak, ontzi laranja batzuetan, eta ondoren Nestlék Bartzelonan duen tratamendu planta batera eramango dituzte. Aluminioarekin lorontziak egiten ei dituzte eta kafe-hondarrekin konposta. Horrela, multinazional suitzarrak produkzio zikloa ixten du. Baina dena ez da hain distiratsua negozio horretan. (gehiago…)

Bankia, Pandoraren kutxa?

2012-05-09  //  Ekonomia  //  Iruzkin bat

Rodrigo Rato Bankiako lehendakariak dimititu egin du. Ekaitza dator berriz ere finantzen arlora.

Espainiako Bankuak eta hainbat erakundek sortutako bankuen birmoldaketarako funtsak (FROB gaztelaniazko akronimoa) Bankia erreskatatu behar izango du, diru publikoz. Askoren iritziz finantza erakundeen Pandoraren kutxa ireki besterik ez da egin. Espainiako Estatuko bankuek eta kutxek etxegintzaren arloan 184.000 milioi euro omen dituzte sartuta. El País egunkariaren gaurko zenbakiak artikulu eta taula (paperean soilik) argigarria kaleratu du eta bertan ikus liteke oso garbi zein diren toxikoak, zein zalantzagarriak, zein inoiz ikusiko ez ditugunak. (gehiago…)

Zer dago Aberri Eguneko azal historikoaren atzean?

2012-04-10  //  Historia, Politika  //  Iruzkinik ez

ARGIAren 2.318 zenbakiaren azala

Aste honetako ARGIAri azal esanguratsua eman diogu. 1964an Gernikan egindako Aberri Egun historikoaren irudi ezaguna da. Mutil bat ageri da, Juntetxeko haritzaren aurrean, txapela kenduta eta burua makurtuta. Euskal erresistentziaren suspertzea irudikatzen du, eta Frankismoaren kontrako borrokaren irudikari grafikoan leku garrantzitsua dauka. Gure azalean kolorea eman diogu argazkiari, nolabait gaur egunera ekartzeko. Argazkia baina, Caracaseko Gudari aldizkarian kaleratu zuten, propio publikatutako ale berezian, eta munduari bira eman zion. (gehiago…)