Helbiderik gabeko arima

Atalak: Uncategorized, Zinema

Zabaltegi

SOUL CARRIAGE

Fitxa teknikoa:

Zuzendaria: Conrad Clark. Antzezleak: Yang Feng Jun, Jia Hong, Chen Jiao Ying. 88 min.

Filmeko irudia.

Filmak iraun bitartean, prentsa eta akreditatuentzako emanaldiko ikusleen herenak aretoa uztea ez zuen merezi. Ez zuen merezi pelikula bukaeran bi lagunek baino ez txalotzea. Geldoa da, bai, eta geldoa egin zaigu hainbat unetan, baina Soul carriage-n istorio interesgarria kontatzen da, eta oso esanguratsua gainera. Zine komertzialaz purrustaka ibili ohi diren kritikariek Mendebaldeko zine eredutik aldentzen den zinematografia gutxiestea ez da oso bidezkoa, baina tira.

Eraikuntza enpresa bateko lankidea istripuz hil da, baina obrak behar den egunerako bukatzea da helburu bakarra eta arazoak urrundu nahian, gorpua familiari eramateko eskatuko dio nagusiak langileetako bati. Hor hasiko da protagonistaren bidaia amaigabea, furgonetarekin egingo duen odisea. Ez ahizpa, ez neska-laguna, ez gurasoak… Etsi arte bilatuagatik, ez du hildakoaren familia topatuko.

Mezua beldurgarria da: Txina erraldoian, kontrasteen inperioan, eraikina dagokion egunean inauguratuko dute, baina bertako langilea identifikatzea eta etxeratzea, hain oinarrizko gauza, ez da posible izango. Adreiluen bidea aukeratu du Txinak (eta ez Txinak bakarrik), eta bide horretan opari bikainak utzi dizkigu filmak: oraindik zergatik ez den hil ez dakien aitona, zirko tradizionalaren eta musika modernoaren arteko talka, egunerokotasunaren detaile txikiak… Gutxiesterik behintzat ez du merezi.