Euskaraldiaren gainetik crossfita lehenetsi du Irungo Udalak

Atalak: Diskriminazioa, Euskara

Euskaraldiaren baitan herritarrek parte hartu behar zuten ekitaldirako espazioa (udaletxe aurreko plaza) eta azpiegiturak lotuta zituzten Irungo Udalarekin, baina hara non, ordu eta leku berean Crossfit lehiaketa deituta zuten Irunen, hori ere Udalarekin adostuta. Asmatu zeintzuk bota dituzten plazatik, Euskaraldi betean zer eta erdara hutsean egin den proba lehenetsita.

Euskaraldiaren egitarauaren barruan, Irungo San Joan plazan Mutxiko taldea, Txorimalo soinu taldea eta Elatzeta Kantuz zituen iragarrita Udalak larunbat eguerdirako. Bertan aritzeko soinu ekipoa eta beharrezko azpiegiturak lotuta zituzten Udalarekin. “Guztia muntatzen hasita geundela, kamioi batzuk azaldu dira Crossfit lehiaketarako tresnak bertan utzi asmoz”, azaldu dute. Bigarren hori ere Udalarekin lotutako ekimena zen. Nonbait, udal bereko Kirol eta Euskara zerbitzuak ez dira koordinatu egutegia osatzerakoan. Udalak iragarritako bi ekitaldiak leku eta ordu berean egingo zirela ez ziren konturatu?

Proposatu diete inguruko kale batean egitea ekimena, “baina baldintzak ez ziren egokiak, eta esan diegu horrela ezin genuela egin, ez zirela moduak”

Euskaraldiko ekitaldiaren parte-hartzaileak bidali egin dituzte plazatik, eta Crossfit lehiaketari utzi diote San Joan plaza. Euskara teknikariak Euskaraldiko parte-hartzaileei proposatu die inguruko kale batean egitea ekimena, “baina ez zen batere leku aproposa, baldintzak ez ziren egokiak, eta esan diegu horrela ezin genuela egin, ez zirela moduak, bertan behera uzten genuela ekitaldia”, kontatu dio ARGIAri Txorimaloak soinu taldeko kideak.

Behin handik alde eginda, euren kabuz atera dute aurrera ekitaldia, Txorimaloak soinu taldeak berak dituen anplifikadore batzuk erabilita: “Urdanibia plazako bazter batean egin dugu, nola ahala”. Izan ere, larunbata azoka eguna da Irunen, eta Urdanibia plazan apenas zegoen lekurik, ekitaldia duin egiteko. Kontua da hiriko erdialde guztia okupatuta zutela crossfiteroek: San Joan plazaz gain, gertu dauden Sargia parkea, San Martzial kalea eta ondoko frontoia.

“Euskaraldi betean, haur, gazte zein helduz osatutako euskarazko ekimena udalak azken momentuan errefusatu egin du, erdara hutsez egin den kirol proba bat lehenetsita”, salatu dute haserre, kirol ekitaldiaren aurkezlea gaztelaniaz baino ez baita aritu. “Haur eta helduok generaman ilusioa eta egindako lan guztia, zeren ikusten ez den lan handia dago atzean, guztia pikutara joan da”, adierazi diote ARGIAri.

“Udaletxeko balkoian Euskaraldiko pankarta harro jarrita duzue, baina beste behin auzolotsa eta amorrua da sentitzen duguna”, erantzun diote Josu Iguiñiz Irungo Euskara zinegotziari, Instagramen.

“Udaletxeko balkoian Euskaraldiko pankarta harro jarrita duzue, baina beste behin auzolotsa eta amorrua da sentitzen duguna”

Zaharrak berri

Euskararekiko eta euskaldunenganako Irungo Udal Gobernuak duen jarrera gogor kritikatu du herriko mugimendu euskaltzaleak. Azken kapitulu hau Euskaraldi garaian izan da, baina txinparta pasa den Euskararen Egunaren biharamunean piztu zen, Irungo Udalak antolaturiko Gabonetako argiak pizteko ekitaldia erdara hutsean egin zutenean. Hiriko 35 elkartek Udalaren hizkuntza politika salatu zuten eta Aski Da mugimendua sortu zen. Hizkuntza plan berri bat eskatu du Irungo Aski Da mugimenduak, eragileekin batera egin beharko litzatekeena. Ikusteke dago, Udalak behingoz jarrera aldatuko duen euskararekiko, ala lehengo lepotik burua jarraituko duen, euskaldunak bigarren mailako herritar sentiaraziz.