Galdera sorta hezkuntzari

Atalak: Zinema

ENTRE LES MURS

Zabaltegi

Fitxa teknikoa. Zuzendaria: Laurent Cantet. Aktore nagusia: François Bégaudeau. Frantzia. 124 min.

Filmeko irudia.

Soldata altuak, opor asko eta lan ordu gutxi. Hori leporatu ohi diet (inbidiaz) ezagutzen ditudan irakasleei. Film honetako irakasle protagonistak ere agian ezaugarri horiek beteko ditu, baina ez nuke bere lekuan egon nahi. Parisko 20. distritoan, etorkinez edo etorkinen seme-alabez osatutako ikasgela kontrolatzea ez da batere erraza. Ikuslearen eserlekutik ordea, izugarri gustura ikusten da ikastetxeko arazoen erradiografia errealista hau.

Poeta hilen kluba pelikula famatuaz geroztik, askotan aspertu gaituzte denaz paso egiten duten ikasleak berpizten dituen irakasle marabillosoaren istorioarekin. Zorionez, hau ez da horrelakoa: hemen, irakasleak ahal duena egiten du, gogo onez ia beti, baina erratu egiten da, eskua joaten zaio noizbehinka, eta noski, ez dauka denerako konponbiderik. Irakaslearen eta ikasleen arteko hartu-emana, bere gorabeherekin, fruituak ematen joango da pixkanaka.

Hartu-eman horrez gain (edo horretatik abiatuta hain juxtu), hezkuntza sistema oro har ezbaian jartzen du Entre les murs-ek; galderak planteatzen ditu etengabe. Gaztigatu egin behar dira portaera desegokiak ala ondo egindakoa saritu behar da? Non bukatzen da irakaslearen lana eta non hasten gurasoena? Nola bilatu oreka, ikasi nahi dutenak ahaztu gabe desmotibatuak erakartzeko?… Bizitzan bezala, ez dago soluzio bakarrik, eguneroko lanak eraikitzen ditu erantzunak.

Ez da harritzeko pelikula honek Cannesko Zinema Jaialdiko Urrezko Palma lortu izana. Dokumentaletik gertu dagoen estilo errealistarekin, etorkizuneko belaunaldien heziketa gauza zaila, nekeza eta frustrantea dela berretsi digu zuzendari frantziarrak; baina ederra batzuetan.