Garoñaren luzapena baimenduko al du Espainiako Gobernuak?

Atalak: Energia

Garoñako zentral nuklearra.

Arabatik 5 kilometrora baino ez dagoen Garoña zentral nuklearra ixteko eskatuz, hamar orduz eraikineko sarrera blokeatu zuten atzo Greenpeace talde ekologistako 60 kidek. Espainiako Estatuan funtzionamenduan dauden zortzi zentraletan zaharrena da Garoña, 38 urte daramatza martxan, lehenengo belaunaldiko zentrala izanik teknologia zaharkitua du eta aurten jada bost hutsegite jasan ditu. Hurrengo urtean erabaki beharko du Espainiako Gobernuak Garoña itxi ala ez. 2004ko hauteskunde kanpainan lehenengo belaunaldiko zentralak ixteko konpromisoa hartu zuen PSOEk, baina orain ez du hain argi.

Garoñak 2019. urtera arte martxan jarraitzeko baimena eskatua du jada, hamar urteko luzapena, alegia. Izan ere, Antonio Cornadó Nuclenorreko Kanpo Harremanetarako arduradunaren hitzetan, “jaio zenean genuen zentrala eta egungoa oso desberdinak dira, teknologia berriei esker osagaiak aldatzen, hobetzen eta modernizatzen joan garelako. Zentrala gero eta fidagarriagoa da eta funtzionamendua gero eta hobea, eta beraz, gero eta seguruagoa”. Alberto Frías Eguzkiren baitako Garoñarik Gabeko Araba talde ekologistako bozeramaileak ordea, ez du iritzi bera eta lehenengo belaunaldiko zentrala azken belaunaldiko bihurtzea ezinezkoa dela dio: “Erreaktorearen ontzia eta ingurua ezin da aldatu eta funtsezkoena hori da; Seiscientosa hartu eta karrozeria soilik aldatuz BMW bat lortzen saiatzea bezala da”.

Kontuak kontu, luzapenaren erabakia hartzeko Segurtasun Nuklearrerako Kontseiluak Garoñako zentralak aurkeztuko dion txostena aztertuko du. Cornadók Kontseilua 400 teknikari independentez osatua dagoela dioen arren, Fríasek ez du uste hain independenteak direnik: “Azken finean, zentral nuklearrei buruzko esperientzia duten teknikariak, logikoki, zentral nuklearretan lan egiten dutenak eta foro nuklearrarekin lotuta daudenak dira. Mundu itxia da”.

Azken hitza Espainiako Industria Ministerioak izango du. Segurtasun Nuklearrerako Kontseiluak zentrala itxi behar dela badio, hala egin beharko da. Jarrai dezakeela ondorioztatuz gero, Ministerioak egingo du azken hautua eta PSOEk jada ez du hain argi hauteskunde kanpainan hartutako konpromisoa: zentralak pixkanaka desegitea. “PSOEk bere kanpainetan energia nuklearra ez sustatzeaz hitz egin du beti, eta ez desegiteaz; beste hainbat arrazoiren artean, gaur egun ezinezkoa delako”, diote Industria Ministeriotik.

1971n sortutako zentralari hasiera batean 25 urteko bizitza eman zitzaion, baina PSOEk lau urteko luzapena eskaini zion 1995ean eta ondoren PPk beste 10 urteko bizitza baimendu zuen. Eguzki talde ekologistaren iritziz luzapen berri bat “astakeria” den arren, ikusi beharko da zein den Madrilgo Gobernuak 2009an hartzen duen erabakia.

ARGIA astekariak Garoñako zentral nuklearra: Erradiografia zorrotza 35 urteko eraikinari izenburupean erreportaje mamitsua argitaratu zuen duela bi urte.