Nola egin aurre eskola porrotari?

Atalak: Hezkuntza

Ezker-eskuin: Meltxor Artetxe, kazetaria, Bego Zuza eta Itziar Pagoaga.

Horra eskola porrotari buruzko mahai-inguruan (Akademizismotik ihes egiteko garaia izenburuko azken Larrunen jasoa) mahaikideei egin diedan azken galdera. Irakasleen rola notizia den egunotan, informazio baliagarria izan daiteke Itziar Pagoaga Hernaniko Langile Ikastolako Bigarren Hezkuntzako Institutuko irakasleak, Meltxor Artetxe Orereta Ikastolako zuzendariak eta Bego Zuza gurasoak eman dizkidaten erantzunak (laburrean):

Nola egin aurre? Pagoagaren hitzetan, “hasteko, jakin-mina ez zikiratuz, askotan eduki ziztrin eta aspergarriekin. Izandako esperientzian oinarrituta, giro ona ezinbestekoa da (eta gainera kutsakorra, motibagarria). Irakasleen prestakuntza ere oso inportantea da, baina egiten den prestakuntza homogeneizatzailea da askotan, adibidez Kalitate famatua, edo zenbait proiektu… Argi eduki behar dugu ikasketa prozesua ez dela Kursaalera joan, lau gauza entzun eta etxera itzultzea, baizik eta jarraitasunezko barne prestakuntza. Burokraziarekin amaitu behar da eta metodologiak anitza izan behar du, nahitaez, bestela ezin zaielako egoera desberdinei aurre egin. Eta aniztasunaz hitz egiten dugunean beti pentsatzen dugu ez dakitenengan, baina ez da hala egin behar. Hasteko, ez dago inor ezer ez dakienik, ez eta dena dakienik ere, eta ‘goiti’ daudenek ere asko ikasten dute laguntzen aritzen direnean”.

Aniztasun beharra azpimarratu du baita ere Artetxek: “Uniformizatze horretatik atera eta ikasle bakoitzari bere interesetatik abiatuz behar duen eskola mota eskaini behar diogu. Bestalde, administrazioak diosku: ‘Zuek haur denak pasako zenituzkete, baina selekzio bat egin behar da’, eta horregatik, selekzio prozesu hori egin behar dugulako, dago hain desbirtuatua ebaluazioa, ebaluazio akademikoa egin behar dugulako. Gizarteak exijitzen digun selekzio prozesu hori egin beharko ez bagenu, balorazio pedagogikoa planteatuko genuke: Nor da hau? Nolakoa da? Non dago? Zer daki? Zein ibilbide egin du aurten?…”

Eta Zuzak, gurasoen paperari heldu dio: “Garrantzitsua da ikustea gurasoek zertan lagundu dezakegun. Eskolan konfiantza izan behar du gurasoak, funtsezkoa da, eta konpromisoa eta ardura izan behar du seme-alabaren heziketan. Gainera, irakasleen ikuspegiarekiko beste sentimendu eta balore batzuk ikusten dizkio gurasoak seme-alabari eta ikaslearen argazkia osatzen lagundu dezake”.

Larrun osoa ikusgai hemen.