Bulkada genero futuristari

Atalak: Zinema

Pelikularen irudia.

Zinema aretoetako aurtengo arrakastarik handienetakoak District 9 du izena. Zientzia fikziozko filma da, eta ez da zientzia fikziozkoa; pelikula soziala da, eta ez da pelikula soziala; akziozko thrillerra da, eta ez da. Eskemak puskatzen dituen lan inteligentea da, gure munduan bizi (biziraun) behar duten estralurtar “errefuxiatuei” buruzkoa.

Duela 20 urte, nabe estralurtar batek huts egin eta airean gelditu zen, Johannesburgoko (Hego Afrika) zeruan. Bertako izakiak kontzentrazio-esparru moduko batean sartu genituen, zer egin erabaki bitartean. Orain, kontzentrazio-esparru hobeago (kontrolatuago) batera eraman nahi ditu gizakiak, arazoak sortzen baitituzte Johannesburgon; “ez dira ondo integratu”. Planteamendu bitxi horrekin abiatzen da Peter Jacksonek ekoitzitako eta Neill Blomkamp hasiberriak zuzendutako istorioa. Argumentu futuristak betiko gaiei heltzeko balio dio zuzendariari: xenofobia eta Apartheida (kasu honetan estralurtarrekin), harremanen konplexutasuna, boteretsuena izateko lehia, herritarren kontrola, ahulenen zapalketa…

Akzio hutsetik ihesi, pizgarri berritzailea eman dio pelikulak generoari, eta horretan datza meritu handiena, etorkizunari buruzko filmen ikuspegia aldatzeko eta beste era batera kontatzeko ateak ireki baititzake (Blade Runner-ek bere garaian egin zuen moduan). Zientzia fikzioaren ohiko eskemak apurtu ditu District 9k; ikusgarritasuna hobetsi ordez, edukiari eman dio garrantzia zuzendariak, gidoi eta pertsonaia landuekin. Protagonistak berak (Sharlto Copley aktoreak) bikain antzeztu du bere rola.

District 9
Zuzendaria: Neill Blomkamp
Gidoilariak: Neill Blomkamp, Terri Tatchell
Aktoreak: Sharlto Copley, Jason Cope, Nathalie Boltt
Zeelanda Berria.
112 minutu. 2009

www.d-9.es