Ez dute ‘Ander’ pelikula estreinatu nahi

Atalak: Zinema

Filmeko irudia.

Ander filma ikusi nahi duen EAEko edo Nafarroako herritarrak Ipar Euskal Herrira joan beharko du, Hegoaldean ez baitu estreinatuko duen banatzailerik aurkitu lanak. Berlinaleko Cicae sariak emandako bultzadaren ostean, 40 jaialditik gora bisitatu ditu aurten Roberto Castónen film euskaldunak, oso emaitza onekin beti ere, sari ugari eskuratuz. Hala ere Espainiako Estatuko zinema aretoetan proiektatu nahi ez izanak zer pentsatua ematen du bertako banaketa politikaz, hain itsua, itxia eta Mayor-en menpe.

Urtarrilean estreinatua, baserri giroko amodio istorio homosexual bati buruzko filma izanik arazoa gaia dela dio Castónek. Nik ez dut uste hori denik, ez hori bakarrik behintzat: kontua da Hollywoodeko Mayor-en menpekotasuna izugarria dela Espainian. Banatzaile handiek pelikula paketeak adosten dituzte areto konbentzionalekin, eta euren aginduetara geratzen dira hauek, besterik eskaintzeko lekurik gabe kasik. Eta beste zer edo zer ematekotan, “komertzialenak” baino ez du aukerarik, irizpide nahiko eztabaidagarri batzuen arabera.

Alternatiba? Gutxi zinemaren munduan, egia esan. Bitartekariekiko menpekotasuna handia da eta autodistribuzioa ez da beste kultur alorretan bezain bideragarria, euskarria (kasu honetan aretoa) ez baita oso eskuragarria. Areto zirkuitu alternatiboak daude, bai, baina formula garatu beharra dago oraindik, benetako aukera izan dadin. Internet ere irteera bat da, nahiz eta pantaila handiarekin amesten duen zuzendariarentzat txiki gelditu.

Kontuak kontu, Frantzian, Alemanian, Holandan, Israelen edo Taiwanen zinema aretoetan ikusi ahal izango dute Ander. Espainiako Estatuan aldiz, eta ondorioz Hego Euskal Herrian, Hollywoodeko komedia erromantiko sakon horietakoren bat hobetsiko dute.