Pilota profesionalaren eredu itxia

Atalak: Kirola

Aspek eta Asegarcek kontrolatzen dute pilota profesionala.

Lau t’erdiko finala gaur zortzi jokatuko dute Juan Martinez de Irujo eta Sebastian Gonzalezek. Ikusmin handia piztu ohi duen hitzordua baliatuz, duela hiruzpalau urteko erreportaje baterako Inaxio Errandonea pilotari ohiak esan zizkidan hitzak berreskuratu nahi izan ditut, ordutik egoera ez baita asko aldatu: pilota profesionalaren jaun eta jabe izaten jarraitzen dute Aspek eta Asegarcek.

“Asegarcek eta Aspek ligaren monopolioa daukate eta zirkuitu itxia ezarri dute, nahi dutena egiteko. Txapelketak ikuskizun moduan hartzen dituzte eta frontoiko emaitzak ez dituzte kontuan izaten. Gainera, nahiz eta profesionala izan, enpresarekin kontratua berritzeko akordiorik lortzen ez baduzu, hurrengo urtean ezin duzu beraien txapelketetan parte hartu”, esan zigun Errandoneak. Nagusigoa duten bi enpresek kirola beraiena izango balitz bezala hartzen dutela adierazi zuen beratarrak: “Hau gure negozioa da eta ez ukitu. Pilotarien artean inor ez dago ados Enpresen Ligaren funtzionamenduarekin, baina Aspe eta Asegarceren esku dago eta mundu guztiak nolabait begiak ixten ditu, elitea hor dago, komunikabideak beraien zerbitzura daude eta eredua ez da aldatzen”.

Patxi Mutiloa Aspeko gerenteari ere eskatu genion iritzia. Bere arrapostua: eredu bat gehiago dela EPEL (Eskuzko Pilota Enpresen Liga), beraiek aukeratutako eredua, eta errentagarritasuna lortzeko enpresa askorentzako lekurik ez dagoela pilota munduan: “Guk badakigu zenbat jende joaten den frontoietara eta zenbat jendek ordaintzen dituen sarrerak, eta diru kopuru horrekin bizi behar da. Une honetan lekuak hartuta daude eta enpresa berriek eratzeko eskubide osoa duten arren, merkatua oso zaila dago. Enpresa bakoitzak ikusi beharko du nondik nora planteatzen duen errentagarritasun gaia”.

Kontuak kontu, berezia da esku pilotako txapelketak kudeatzeko modua, gainontzeko kirol lehiaketekin alderatzen badugu behintzat. Eusko Jaurlaritzak 1999an onartutako pilotaren inguruko plan estrategikoak enpresen liga bat sortzeko beharra aurreikusi zuen; profesionalak Afizionatu mailatik desberdinduko zituen liga bat. Hausnarketa horren ondorioz, 2002an EPEL jaio zen, Asegarce eta Aspe enpresen gidaritzapean, eta gaur egun, bi horiek kantxen jaun eta jabe bihurtu dira. Izan ere, liga itxia da eta ez du beste enpresen parte-hartzea onartzen.