Avatar, 898 milioi euroko iruzurra

Atalak: Zinema

Filmeko irudia.

Ondo atera zaio jokaldia James Cameron kanadarrari: Avatar sonatuak 898 milioi euro baino gehiago irabazi du sarrera salmentetan. Zinema geroz eta gehiago egongelako telebista handian ikusten den garaiotan, Cameronek badaki nola erakarri jendea aretoetara: ikusgarritasuna saldu zigun, berrikuntza, etorkizuneko zinema… Baina espero dezagun hau ez izatea etorkizuneko zinema, sekulako iruzurra izan baita emaitza.

Berrikuntzarik ez diot ikusi jada aretoetan historiako bigarren film ikusiena den honi (Titanic da ikusiena, Cameronena hau ere). Hiru dimentsioak jada ez dira berrikuntza, eta pelikulan gainera ez zaizkit batere ikusgarriak iruditu, nahiz eta teknikoki sofistikatuagoak izango diren beharbada. Beste zein arrazoirengatik jarri pantaila handiaren aurrean eta ez deskargatu Internetetik? Efektu berezi itzelez gozatzeko, agian? Bada, horiek ere, ez dira apartekoak.

Eta okerrena, istorioa bera. Askok ohiko aretoetan ikusi dute filma, 3D efekturik gabe, eta Interneten lanik deskargatuena da oraintxe; hots, ikusgarritasunak baino, istorioak erakarri ditu ikusle hainbat: baina zein istorio? Matrix-ek jorratu zuen avatar edo mundu paraleloena (aprendiza heroi bihurtuz, Matrix-en bezalatsu)? Eraztunen Jauna filmaren antzera gaizkilearen aurka naturako elementuak eta herri bizilagun baketsuak biltzen dituen bataila epikoarena (eta epikoa esatea asko da)? Hasieratik agerikoa den maitasun istorio light-a?… Bitxikeri modura, San Petersburgoko Komunista taldeak zuzendari kanadarra atxilotzeko eskatu du, zientzia fikzio sobietarretik Pandora planetaren ideia plagiatzeagatik.

Izan duen arrakasta ikusita, Avatar-en bigarren zatia martxan da dagoeneko. Ea beste hamar urte igarotzen diren pantailara eraman aurretik. Eta ea ez den etorkizuneko zinemaren eredu bilakatzen, bide okerra hartuko baitugu bestela.