Krisia onuragarria da zinemarentzat

Atalak: Zinema

Avatar, historiako pelikularik ikusiena.

Hori ondorioztatzen da behintzat Ikus-entzunezko Behatoki Europarrak jakinarazi dituen datuetatik. 2009an, 985 milioi ikusle gerturatu ziren Europar Batasuneko zinema-aretoetara, iaz baino %6,5 gehiago, krisiaren errealitate gordinetik ihes egin nahian agian? Izan ere, 2004tik lorturiko daturik onenak dira horiek.

2004an mila milioi ikus-entzuleen marka gainditu zen Europar Batasunean eta zifra horretatik gertu ibili da aurten Behatokian bildutako 24 herrialdetako datua. 200 milioi ikusle izan dituzte zinema-aretoek Frantzian, 173 Britainia Handian, 146 Alemanian eta 110 milioi Espainian, besteak beste. 18 herrialdetan kopuruak gora egin du, 2008arekin alderatuta, eta soilik Portugalen, Italian, Letonian, Finlandian, Irlandan eta Txekiar Errepublikan joan dira iaz baino ikus-entzule gutxiago aretoetara.

Hori bai, superprodukzioak izan dira jaun eta jabe (Avatar, Ice Age 3, 2012, Up…) eta Hollywoodi esker lortu ditu zinemak zifra ikusgarri horiek. Aipatu moduan, krisitik aldentzeko ihesbide bila doanarentzat, hausnarketa gutxiko eta efektu berezi askoko entretenimendua izan daiteke onena. Gainera, ez dago marketinean Hollywood gaindituko duenik.