Gerra hasi dute Disneyk eta zinema kateek

Atalak: Zinema

Alice in Wonderland-eko irudiak.

Mundu mailako boikota egin nahi diote beti bezain sui generis datorren Tim Burtonen azken lanari: Alice in Wonderland (Alizia herrialde miragarrian). Disney banatzaileak ohi baino lehenago atera nahi du filma DVDan, eta zinema kate handiak ez daude hori onartzeko prest. Borroka gogorra abiatu dute bi aldeek, eta irabazlearen arabera panorama aldatu daiteke.

Martxoan estreinatuko da Alice in Wonderland. Udako oporrak eta Interneteko deskargak saihesteko, ohiko 17 asteak itxaron beharrean zinema-aretoetan estreinatu eta 12 astetara DVDan banatu nahi du lana Disneyk. Lortuko balu, beste banatzaile batzuek ere bide bera hartu nahiko lukete, ziurrenik, eta aurrerapen hori zinema-aretoentzat oso kaltegarria litzatekeela diote aretoak kontrolatzen dituzten kateek.

Ondorioz, Britainia Handiko zinema-aretoen %60a duten Odeon, Vue eta Cineworld kateek, eta Herbeheretakoen %85a kontrolatzen duten Minerva, Pathé, Wolff eta Jogchems kateek ez dute pelikula estreinatuko. AEBetan ere laster neurri bera iragarriko dutela aurreratu du Herbeheretako zinemagileen bozeramaileak. Disney iritziz aldatzera behartuko duen “elur bola handia” eragin nahi omen dute.

Zinema-aretoek filmaren promozioa eta kopiak martxorako prest izan ditzaten, astebete inguruko epea du Disneyk iritziz aldatzeko, bestela galera ekonomiko handiak jasan ditzake lanak. Zeinek irabaziko ote du botere lehia?