Si en Euskal herria no se puede hablar en euskera, tiremos la democracia donde los cerdos

Atalak: Euskara

Zeinek esango zion Oskorriri bere abesti baten hitzak gogorregitzat joko zirenik eta are gehiago, dimisio bat ez, bi eragingo zituztenik! Diario de Navarra egunkariak honela eman zuen atzo berria: “La decisión del área de Euskera del colegio público Remontival de Estella de que los alumnos interpretaran una canción del grupo Oskorri en la que se incluyen frases como ‘si en Euskal herria no se puede hablar en euskera, tiremos la democracia donde los cerdos’ o ‘ya es hora de que, de una vez, ganemos o perdamos esa guerra’ ha originado una fuerte polémica en la comunidad del centro”.

Lizarrako Remontival eskola publikoan, gurasoen elkarteko presidenteak eta presidenteordeak dimititu egin dute, Euskararen Astean A ereduko ikasleei Oskorriren Euskal Herrian Euskaraz kanta ezaguna abesteko eman zietelako. Euskara batzordeak oharra atera behar izan du, adieraziz abestia sortu zenean euskaraz egitea debekatua zegoela, baina ez dela demokraziaren aurkako kanta. Nik gaineratuko nuke oraindik ere kantak gaurkotasun handia duela hain justu Nafarroan, non euskaraz ikasteko eskubidea ukatzen zaien hainbat eta hainbat euskal hiztuni. Iragan larunbateko manifestazio jendetsua horren lekuko dugu, nahiz eta Miguel Sanzen arabera “inork ezin dezake esan euskararen aurka egin dugunik, ezta gutxiago ere”.

Kanta herrikoi “polemikoaren” hitzak guztiz gogoratzen ez badituzu, hona lehenengo bi bertsoak:

Euskal Herrian euskaraz
nahi dugu hitz eta jolas
lan eta bizi euskaraz eta
hortara goaz,
bada garaia noizbait dezagun
guda hori gal edo irabaz.
Zabal bideak eta aireak
gure hizkuntzak har dezan arnas,
bada garaia noizbait dezagun
guda hori gal edo irabaz.

Euskal Herrian euskara
hitz egiterik ez bada
bota dezagun demokrazia
zerri askara
geure arima hiltzen uzteko
bezain odolgalduak ez gara.
Hizkuntza gabe esaidazue
nola irtengo naizen plazara,
geure arima hiltzen uzteko
bezain odolgalduak ez gara.