Langileak ur-lasterraren kontra

Atalak: Ekonomia, Gizartea, Zinema

Dokumentalaren kartela

Enpresa baten salmenta susmagarria, egun batetik bestera kale gorrian dauden 1.800 langile, eta kapitalismo bortitzenaren kontrako beharginen borroka luzea. Efecto Iguazú (2000) dokumentalak osagai guztiak ditu greba orokorraren egunean aipatzeko. Teléfonica boteretsuaren Sintel taldeko 1.800 langileen odisea kontatzen du dokumentalak: sei hilabete Madrilgo Castellana Pasealekuan kanpatuta, euren eskubideen alde protestan.

Pribatizazio prozesua aprobetxatuz, Sintel enpresa subsidiarioa Miamiko enpresaburu bati saldu zion Teléfonicak, gainetik kentzeko. Ondoren, porrot egoera argudiatuz, enpresari horrek egun batetik bestera Sinteleko 1.800 langile kanporatu zituen. Hori guztia salatzeko, Espainiako Estatuko hainbat herritatik gerturatutako 1.500 langilek baino gehiagok (eta ondoren baita euren familiarrek ere) sei hilabete eta hiru urtaro igaro zituzten kanpatuta Madrilgo gunerik aberatsenetakoan: 187 egun, 2001eko urtarrilaren 29tik abuztuaren 4ra.

Kapitalismoari, pribatizazioari, globalizazioari… egiten zaizkion kritika ekonomiko eta politikoak gutxi ez badira ere, batez ere borroka horren alde humanoa erakusten digu Pere Joan Venturaren dokumentalak: Madril erdian gizarte txiki bat antolatu duten pertsonen elkarbizitza, arazoak, kezkak, ametsak, egunerokoa… dira protagonista, auzo aberatsarekin kontrastean. Borroka luze horrek eta arlo guztietatik jasotako elkartasunak negoziatzera bultzatu zuen Gobernua, eta akordio batera iritsi ziren. Helburuak erabat bete ez baziren ere, langile mugimenduaren ikur izan zen Sintelekoena, Goliathen aurka errenditzen ez diren David ausartena.

Krisi ekonomikoan murgilduta, langabeziak itota eta greba orokorra gainean, gaurkotasun handikoa dirudi Sinteleko enpresa-batzordeko presidenteak dokumentalean azaltzen duen Iguazu efektua, Argentinako ur-jauzi famatuak gogoratuz: “Ibaiaren erdian, txalupan doazen arrantzaleak gara langileak, eta ibaia bare dagoela uste dugu, ur-jauzira hurbiltzen garen arte eta ikusten dugun arte ur-lasterra bortitza dela, azkar mugitzen dela kapitalismo globalizatzaile eta espekulatzailearen ur-lasterra. Eta gainontzeko arrantzaleak ohartarazi nahi ditugu, ibaia ez dagoela bare, neurriak hartu behar dituztela ur-lasterrak arrastatuta ur-jauziak irenstea nahi ez badute. Gaur egun, munduan milioika langile gaude Iguazu efektuaren eraginpean”.

* Informazio gehiago: www.sintelasociacion.com