Emakumeentzako zinema = tuntunentzako zinema

Atalak: Zinema

Eskainiko dituzten filmen irudiak.

Hala pentsatzen dute Kinepolis zinema aretoek, Espainiako hainbat hiritan bigarrenez antolatu duten Ladies and the Movies ekimena ikusita. “Emakumeentzako zinema” etiketa zaharkitua berreskuratzearekin pozik ez, eta esklusiboki emakumeentzat lau film txatxu aukeratu dituzte, estereotipo atzerakoienetan oinarrituz.

Funts handirik gabeko hiru komedia erromantiko (Letters to Juliet; Eat, pride, love; Bon Appètit) eta Christina Aguilera kantariaren luzimendurako musikal tipikoa (Burlesque). Hori da “neskek zinemarekin duten hitzordua”, antolatzaileen arabera. Horrez gain, ongietorri koktela, relax gunea, personal shopper delakoak, vibropower saioak, marka ezagunen postuak (Beauty Concept, Special K, Cosmopolitan, Font Vella…) eta beste hainbat ekitaldi “glamouroso” prestatu dituzte.

Batzuek (emakume zein gizonezko) izango dituzte halakoak gustuko, noski, baina poblazioaren erdia zaku berean sartzea ez da oso egokia, batez ere zakuari kirats arrox-estereotipatu-erreakzionarioa darionean…