Facebook ez da gutxienekoa

Atalak: Uncategorized, Zinema

Filmeko irudia.

Tragedia grekoa egin nahi izan duela adierazi du David Fincher zuzendariak (Seven, Fight club), eta baieztatu egin dute kritikariek: The Social Network-en, Facebooken sorrera kontatzen duen azken fenomeno zinematografikoan, gutxienekoa da Facebook; lehiakortasuna, traizioa, bekaizkeria, anbizioa, bakardadea ditu ardatz. Baina Facebook ez da gutxienekoa, XXI. mendeko (in)komunikazio tresna indartsuenetakoaz gogoetatzeko pelikula aproposa da hau.

Erabiltzaileen datuak iragarleei salduz 35.000 milioi dolar irabazi izanaz, AEBetako Kongresuan sare sozialen pribatutasuna auzitan egoteaz, estatubatuarren %63a Facebookek bere informazio pertsonalarekin egiten duenaren beldur izateaz, “lagun” birtualak pilatzea eta egoa puzteko norberaren ekintzak publiko egitea helburu dituen gune honen arrakastaz. Hori guztia ere jorratu zezakeen pelikulak, baina egoera metaforikoagoa irudikatu du Fincherrek: birtualki lagun eta jarraitzaile ugari izan arren, bakarrik dagoen protagonista, bizitza errealeko harremanetan moldakaitza.

2004an sortutako asmakizunak dagoeneko 500 milioi erabiltzaile ditu munduan eta protagonistaren egoera ez da hain sinesgaitza. Nolako harreman-moldeak osatu nahi ditugu etorkizunean? Hausnarketarako lan egokia da The Social Network, ongi egina: nabaria da zuzendari berezi honen ukitua, ederki harilkatzen da gidoia, eta Eisenberg aktore protagonistak lan txukuna egin du. Agian, 2.0 kutsua falta zaio, nahiko estilo klasikoan baitago narratua, eta pelikulak berak argi uzten duenez, beste erritmo batean mugitzen da egungo gizartea.

The Social Network
Zuzendaria: David Fincher.
Gidoilariak: Aaron Sorkin.
Aktoreak: Jesse Eisenberg, Andrew Garfield, Justin Timberlake.
AEB, 122 minutu.