Noizko beldurrezko euskal filma?

Atalak: Zinema

Nicholson, beldurgarri "The Shining" filman.

Etzi abiatuko da Fantasiazko eta Beldurrezko Zinemaren Astea Donostian. Tartean izango dira zaletuen artean ikusmin dezente piztu duten Monsters eta The Last Exorcism filmak. Euskal ekoizpenik ez ordea. Euskaraz errodatutako lanak genero anitzetara irekitzen ari diren honetan, noizko beldurrezko bat?

Izan ere, denbora luzez buruan (eta amesgaiztoetan) iltzatuta geratzen den generoa da terrorezkoa. Psicosis, Poltergeist, The Exorcist, Jaws (Spielbergen marrazoarena), Alien, The Silence of the Lambs, Freddy Krueger-enak, Carrie, Dracula, The Ring… Ziur garrasi egin duzula baten batekin, edo begiak itxi. Eta ziur pentsatu duzula: baina zergatik ireki du ilunpetan dagoen etxetzarreko ganbarako atea?! Zergatik joan da bikotea musukatzera basoko lekurik zokoratu eta arriskutsuenera, edo atera du zakurra paseatzera farolarik gabeko kalexka horretara, edo joan dira festa giroan hilerri abandonatura?…

Gorea, efektista edo psikologikoa izan daiteke terrorea. Nik hirugarren motakoa nahiago, eta generoko film denetan nire kuttunena: The Shining, Stanley Kubrick zuzendari handiarena (Ipar Euskal Herrian izenburu orijinala mantendu zuen, Hegoaldean aldiz itzuli egin zuten, El resplandor izenarekin). Jack Nicholson eroaren begiradak eta irribarreak hotzikara sortzen didate oraindik, eta zer esanik ez neskato bikien ahots deskribaezinak.

Seguru zuk ere baduzula beldurrezko film maiterik, izuak airean utzi zizun hura. Bada, eskuekin ondo estutzeko manta hartu, aurretik komunetik pasa, eta asteburu honetan alokatu dezakezu. Eta oso ausarta bazara, gauez, ilunpetan eta bakarrik ikusi (etxeko leihoak eta atea ondo itxi ostean, badaezpada).