Zentsuraren plazer ezkutua

Atalak: Zinema

A Serbian Film pelikularen irudia.

Bai, zer edo zer iluna, erakargarria eta gozagarria izan behar du zentsuratzeak, bestela ez da ulergarria. Hain susmagarria izan ohi den prebentzioaren izenean, A Serbian Film pelikulak “sexu askatasunaren aurkako deliturik” egiten duen ikertu bitartean, behin-behineko neurria hartu du Donostiako epaitegi batek: nazioarteko jaialdi ugaritan parte hartu duen eta sari garrantzitsu hainbat eskuratu dituen filma ez da Fantasiazko eta Beldurrezko Zinemaren Astean proiektatuko.

Izan ere, fikzioan ere delituak egiten dituzte, eta noski, agintariei dagokie ikusle burugabe eta gizajoa babestea. Aukerarik onena eta efektiboena, betikoa: debekua. Kontua da, naziei, hiltzaileei, bortxatzaileei, mafiosoei eta oro har legea hausten duten guztiei buruzko artelan, liburu eta filmak debekatzen hasi beharko ginatekeela, zentsura prebentiboaren plazer ilun, erakargarri eta gozagarria sentitzeko.

Dena den, mesedea ere egin dio epaileak filmari. Probokazioa da nagusi A Serbian Film pelikulan, pornografia era guztietako jarrera bortitzekin nahastuz. Polemikari esker, ezagutzen ez zutenen arreta bereganatu du orain, eta bide batez, bere helburua lortu du: probokatzea.

Jose Luis Rebordinos Beldurrezko Zinemaldiaren zuzendaria eszenatokian agertu zen atzoko emanaldietako batean, epaiaren afera eta Ertzaintza bere bila nola joan zen kontatzeko.