Ukitu iluneko maitasun istorioa

Atalak: Uncategorized, Zinema

Filmeko irudia.

Gabon giroan telebistan eman ohi duten pelikula da Edward Scissorhands (Edorta Artaziesku). Hain zuzen, abenduz estreinatu zen, eta hogeigarren urteurrena bete berri du askorentzat jada kultuzko filma denak. Hogei urte bete ditu baita ere, lan honi esker, Tim Burton-Johnny Depp tandem bikainak.

Asmatzaile batek sortutako Edward izaki xaloaren eta herrira jaisten denean ezagutuko duen neskaren arteko maitasun istorioa baino ez du kontatzen filmak, erromantizismoa eta umorea nahastuz. Baina Burtonen ukitua du Scissorhands-ek, iluna, misteriotsua, goibela, magikoa, ezkutua… Argia baino, maiteago du itzala Tim Burtonek, kolore eztanda eta algara baino, kutsu beltza eta ironia. Eta zigilu hori neurrigabe esplotatu gabe (beste batzuek egin ohi duten moduan, errepikakor eta aspergarri bihurtzeraino) zapore oneko arrastoa uzten du zuzendari kaliforniarrak bere lanetan. Beetle Juice, Batman, Corpse Bride, Sleepy Hollow, Big Fish handia, Charlie and the Chocolate Factory… dira horren lekuko.

Nerabe eszentrikoa, irudimen handikoa, bakartia eta lagunak egiteko txarra izan omen zen Burton, eta esperientzia horixe baliatu zuen Edward irudikatzeko, Johnny Depp-ek maisutasunez antzeztua. Frankenstein-en antzera, onartua ez den izaki ezberdinaren istorioa dakarkigu, eta gogoeta egiten du benetako munstroa zein den. Gabonak, finean, goibelak, ilunak eta eszentrikoak dira askorentzako, krisi garaiotan batik bat.

Ikusi trailerra bertsio orijinalean: