Xalaren apendizitisa eta enpresa ahalguztidunak

Atalak: Kirola, Uncategorized

Xalak ezingo du finala jokatu.

Xalak ez du Buruz buruko finala jokatuko, pilota munduan ahalguztiduna den Eskuzko Pilota Enpresen Ligak (EPEL) hala erabakita. Oinatz Bengoetxeak ordezkatuko du, Aimar Olaizolaren aurka. Adierazpenak egin dituzten pilotari guztiak, eta ez dira gutxi, erabaki horren aurka agertu dira, tartean Retegi I, Bengoetxea, Julian Retegi, Galarza, Arretxe, Beloki, Eugi, Abel Barriola, Patxi Ruiz edo Irujo. “Finala finalera iritsi direnek jokatu behar dute. Publikoak hori espero zuen eta berdin dio partidua maiatzean, ekainean edo uztailean jokatzen bada”; “hain nago haserre denarekin eta gauzak egiteko moduarekin, ez dudala ezer esan nahi”; “Oinatzek jokatzeak ez du ez hanka ez buru, hori ez da finala”; “arauak komeni zaien eran aplikatzen dituzte enpresek”; “bidezkoena izango litzateke Sanferminak pasa arte atzeratzea norgehiagoka”; “Xalak denbora gehiago merezi zuen, baina enpresek beraien interesei begiratu diete”… Horiek prentsak haserre dauden pilotariengandik gaur jasotakoak.

Azken finean, horren guztiaren atzean kirol honen kudeaketa eredua dago: Eusko Jaurlaritzak 1999an onartutako pilotaren inguruko plan estrategikoak enpresen liga bat sortzeko beharra aurreikusi zuen; profesionalak Afizionatu mailatik desberdinduko zituen liga bat. Hausnarketa horren ondorioz, 2002an EPEL jaio zen, Asegarce eta Aspe enpresen gidaritzapean, eta gaur egun, bi horiek kantxen jaun eta jabe bihurtu dira. Izan ere, liga itxia da eta ez du beste enpresen parte-hartzea onartzen.

Aspaldi egindako erreportaje batean, gaiari buruz mintzatu zitzaidan Inaxio Errandonea pilotari ohia, baina hitz horiek ez dute gaurkotasunik galdu, ordutik egoera ez baita gehiegi aldatu: “Asegarcek eta Aspek ligaren monopolioa daukate eta zirkuitu itxia ezarri dute, nahi dutena egiteko. Txapelketak ikuskizun moduan hartzen dituzte eta frontoiko emaitzak ez dituzte kontuan izaten. Gainera, nahiz eta profesionala izan, enpresarekin kontratua berritzeko akordiorik lortzen ez baduzu, hurrengo urtean ezin duzu beraien txapelketetan parte hartu”, esan zigun Errandoneak. Nagusigoa duten bi enpresek kirola beraiena izango balitz bezala hartzen dutela adierazi zuen beratarrak: “Hau gure negozioa da eta ez ukitu. Pilotarien artean inor ez dago ados Enpresen Ligaren funtzionamenduarekin, baina Aspe eta Asegarceren esku dago eta mundu guztiak nolabait begiak ixten ditu, elitea hor dago, komunikabideak beraien zerbitzura daude eta eredua ez da aldatzen”.

Patxi Mutiloa Aspeko gerente ohiari ere eskatu nion iritzia. Bere arrapostua: eredu bat gehiago dela EPEL, beraiek aukeratutako eredua, eta errentagarritasuna lortzeko enpresa askorentzako lekurik ez dagoela pilota munduan: “Guk badakigu zenbat jende joaten den frontoietara eta zenbat jendek ordaintzen dituen sarrerak, eta diru kopuru horrekin bizi behar da. Une honetan lekuak hartuta daude eta enpresa berriek eratzeko eskubide osoa duten arren, merkatua oso zaila dago. Enpresa bakoitzak ikusi beharko du nondik nora planteatzen duen errentagarritasun gaia”.