EPEL ipurdibistan

Atalak: Kirola

Xala hunkitu egin da prentsaurrekoan.

Bai, ipurdibistan utzi du Xalak EPEL Eskuzko Pilota Enpresen Ligaren antolakuntza, gaur arratsaldean Irunen eskainitako prentsaurrekoan. Pilotari lapurtarraren apendizitis ebakuntza zela-eta, ekainaren 19an jokatuko den buruz burukoaren finaletik kanpo uztea erabaki zutenetik, arauak nahi erara aplikatzea eta errentagarritasunari baino ez begiratzea egotzi die hainbat zaletu eta pilotari haserretuk Asperi eta Asegarceri. Bada, gaur Xalaren hitzak entzun ostean, agerian geratu dira erabakiaren kontraesan eta hutsuneak.

Mikel Olazabal aipatu du Xalak lehenik, duela zortzi hilabete hari ere Xalaren moduko ebakuntza egin ziotelako, apendizitisagatik baita ere. Aspek berak 19 egunera jarri zuen frontoian lehiatzen eta hiru partidu jokatu zituen hiru egunetan. “Nik 27 egun ditut osatzeko, zergatik ez naiz ni gai izango jokatzeko? Ez dut ulertzen”. Hortik aurrera, kontuan hartzekoak prentsaurrekoan Xalak eta pilotariaren medikuek eta abokatuak mahai gainean jarritakoak: nola da posible pertsona bakar batek (EPELeko epaileak) hartzea lapurtarra finaletik kanpo uzteko erabakia? Nola da posible erabaki hori hartzea enpresako medikuek pilotaria aztertu gabe eta Xalaren beraren medikuei galdetu ere egin gabe? Ebakuntza nola joan den eta ondorioak zeintzuk izan diren kontsultatu gabe? Izan ere, lapurtarraren medikuek diote (agiri medikuak erakutsi dituzte) entrenatzen hasteko (hasi da dagoeneko) eta uztailaren 3an (Sanferminen aurretik) finala jokatzeko ez duela inongo eragozpenik. EPELen jarrera itxia da, ordea: prentsaurrekoa baino lehen, 16:00etan, enpresekin hitzordua lotua zuen Xalak joan den larunbatetik, eta gaur 14:00etan esan diote hitzordua eskatzeko e-posta bidali behar duela lehenengo, beraz ezin izan du bildu agintariekin.

Hunkituta hitz egin du pilotariak, malkoei ezin eutsirik. Eta haserre. Enpresa pribatu batzuen esku egon arren, horien gainetik legeak ere badaudela gogoratuz. “Zeinek onar dezake hau? Nahaspila honen benetako garailea pilota izatea nahi dut. Pilota handia da, ez da dirua bakarrik”. Finala jokatzea berari dagokiola eta eskubide hori aldarrikatu du Xalak.

Arazoak esku artetik ihes egin diezaieke enpresei, Xalaren partez finalean Bengoetxea mantentzearekin tematuz gero. Boterea eta erabakimena beraiek dute, baina asko dira ahots kritikoak eta Xalarekin dago afizioa, baita gainerako pilotariak ere, egin dituzten adierazpenak aintzat hartzen baditugu. Ostegunerako dago pilota aukeraketa iragarrita eta soka luzea ekarriko du kontuak, dudarik gabe.