Pilotarien gainkargak eta beste hainbat zalantza

Atalak: Kirola

Merino, Titin, Laskurain eta Xala, Binakako Txapelketako txapeldun eta txapeldunordeak / irekia.euskadi.net

Buruz buruko pilota txapelketa hasi berritan, pasa den igandean Titinek eta Merinok (bikain jokatuta, dena esate aldera) irabazitako Binakako txapelketari buruzko lauzpabost galdera:

1) Normala al da partiduetan pilotariek jasaten dituzten gainkarga eta lesioekin (bat baino gehiago ikusi ditugu txapelketa honetan) hain laxo jokatzea? Alegia, mina duenak (edo norgehiagokaren gogortasunagatik xehe-xehe egina dagoenak) nahi bestetan eta nahi adina denbora aldageletara erretiratzeak nola eragiten dio partiduari? Enpresen Ligako arautegiak ez du gainkargen afera aipatzen, baina Aspeko Komunikazio arduradun Ibon Arakistainek argitu didanez, “larrialdi medikoa denean, pilotaria aldageletara/erietxera sartu daiteke nahi beste alditan. Hori bai, aldageletara/erietxera sartzen diren bakoitzean epailea ere haiekin joaten da eta berak erabaki dezake pilotariak emandako arrazoia balekoa den ala ez”. Maltzurra izan da nire hurrengo galdera: plantak eginez edo leher eginda dagoelako atseden pixka bat hartzeko beharrez, pilotaria aukera horretaz baliatzeko arriskurik ez al dago? “Gaur arte, ez da egon pikareskarik eta sartu diren denak osasun arazoengatik sartu dira”, arrapostua.

2) Zergatik izan da hain luzea txapelketa? Gogoratzen den Binakako luzeenetakoa izan da aurtengoa, luzeena izan ez bada. Final-laurdenetako ligaxkan joan-etorriko partiduak  jokatzeak luzatu egin du lehiaketa, baina arriskua du horrek: jokalariak biziki nekatzea, hurrengo lehiaketara leher eginda iristea edo hurrengo txapelketa gain-gainean delako, lesioren bat sufrituz gero finala atzeratu ezin izatea…

3) Bidezko sistema al darabil txapelketak? Hainbat jende kexatu egin da partidu gehien irabazi dituen Olaizola II-Beroiz bikoteak (hamabost norgehiagoka irabazi eta bi galdu) ez duelako finala jokatu. David Merinok ez du zalantzarik (Larioja.com): “Hori da dagoena eta justua da. Lehenengo faseko partidu guztiak irabazi dituzte, baina finalaurrekoetan ez. Ez dira erregularrak izan behar zutenean, eta gainera, zorte txarra izan dute” (gogoratu Beroizen eskuko lesioa, semifinaletan).

4) Prestakuntza psikologikoari zenbaterainoko garrantzia ematen ote diote kirolariek? Beste era batera galdetuta, Buruz buruko azken txapelduna zergatik ez zen gauza izan finalean %100a eskaintzeko? Egia da Merinoren joko ikusgarriak aukera gutxi utzi ziela aurkariei, baina Xalak ez zuen dena eman. Presioari aurre egiteko moduak, indartsu eta motibatuta ateratzeak, zenbaterainoko zerikusia du? “Alde fisikoak balio duzuna emango dizu; baina jokatzeari ekiten diozunean, balio duzun hori guztia ematea, aurretik eta partidan zehar hartzen dituzun erabaki eta jokaeren menpe dago askotan”, adierazi zidan bere garaian Joxean Arruza psikologo eta hezitzaile fisikoak.

5) Hemendik aurrera (beste nonbait frontoi handiagoa eraiki arte) Miribillako Bizkaia pilotalekuan baino ez al dira jokatuko finalak? BECek dituen zulo ekonomikoak ezagutu ostean, zergatik eusten zaio azpiegitura erraldoien politika antzu honi?