Munduaren amaiera iritsi bitartean

Atalak: Zinema

Filmeko irudia.

Negarrik ez egiteko. Hori du Hushpuppy 6 urteko neska protagonistak aitaren agindu nagusietakoa. Indartsua izaten jakin behar du, basatia, oihaneko erreinuan erregina. Benh Zeitlin zuzendari estatubatuarraren filma bera ere, Beasts of the Southern Wild (Hegoalde Basatiko Piztiak), halakoxea da: indartsua eta basatia.

Gizarteko bizimodu estandarrari uko egin eta zibilizazioaren atzaparretatik at, beste hainbat lagunekin komunitatean aske bizi dira protagonistak, naturak eskaintzen dizkien baliabideekin. Arriskua gertu dago, ordea, dikearen mugaz bestaldera dagoen guztia urpean desagertu daitekeelako, eta halako batean munduaren akabera iritsi daiteke, Hushpuppyk ezagutzen duen munduarena bai, bederen. Haatik, erresistentzia ondo ikasitako lezioa du neskatilak, eta ez du berehalakoan amore emango, ez berak ez gainerakoek. Euren eskubidea da, euren hautua: maite dituzten lurretan jarraitu nahi dute, maite duten jendearekin, maite duten moduan bizitzen.

Estetika bortitzeko emaitza bisual eder eta ikusgarria lortu du Zeitlinek, tarteka errealismo fantastikoarekin jokatuz. Inuzentziatik, xalotasunetik eta perfekziotik urrun, pertsonaia boteretsuak dira aita-alaba (baita aktoreen antzezpena ere), arazorik gabe hartzen dute pelikula beren gain eta 6 urteko neskatilaren ikuspegitik kontatzen zaigu zer den bizirautea, maitatzea, borrokatzea eta norberaren erroei eta bideari eustea. Agian ez da bide egokiena izango, baina norberak hautaturiko bidea da, eta munduaren amaiera iritsi arte, zein da nor hautu hori debekatu eta zibilizazioren zakura behartzeko?

ZABALTEGI SAILA

Beasts of the Southern Wild

Zuzendaria: Benh Zeitlin

Gidoilariak: Benh Zeitlin, Lucy Alibar

Aktoreak: Quvenzhané Wallis, Dwight Henry, Levy Easterly, Lowell Landes, Pamela Harper, Gina Montana

AEB. 92 minutu.