Omenaldia agoteen lurraldeari

Atalak: Zinema, Zinemaldia 2012

Unax Ugalde aktorea, agote rolean.

Buztana dute, Deabruaren gisan. Agoteek gaixotasuna eta hondamendia dakarte eta horregatik baztertzen ditu Baztango herriak Bozate auzora. XVII. mendean girotutako trama du ardatz Baztan filmak, baina aitzakia baino ez da; egiaz, bailara bera da pelikulako protagonista, Baztango egungo erretratua, haren historia eta Julio Medemen Behiak filma uztartuz.

Metazinemarekin jolasean dihardu Iñaki Elizalde zuzendariak film osoan zehar. Iraganeko eta egungo Baztan tartekatzen zaizkigu, aktore berek pertsonaia ezberdinak antzezten dituzte, eta ugariak dira Behiak filmari zeharka edo zuzenean egindako keinuak. Areago, bi pelikulek dute Michel Gaztambide gidoilari, eta Medemen lanean parte hartu zuten aktoreak berriz elkartuko ditu Baztanek, haien burua antzeztuz (beste rol batzuen artean). Ausardia eta originaltasuna beti dira eskertzekoak, baina jolasteak bere arriskua du, eta ikuslearenganako konplizitateetan tematzeak, baita erretratu osoa eskaini nahiak ere, sakontasuna kentzen dio istorio nagusiari. Kontakizun ugariren artean, desorekatu eta hainbatetan indarra galtzen du hariak.

Onirikoa eta enigmatikoa zen Medemen Baztan; kutsu horri ikuspegi lurtarra eta gaurkotua txertatu dizkio Elizalderen filmak, estetikoki ederra, nabaria baita bailarak biengan sortzen duen lilura. Donostiarraren lanari segida eman nahiko balio bezala, agoteen lurraldeari eskainitako omenaldi propioa osatu du zinegile iruindarrak.

ZABALTEGI SAILA

Baztan

Zuzendaria: Iñaki Elizalde.

Gidoilariak: Iñaki Elizalde, Michel Gaztambide.

Aktoreak: Carmelo Gómez, Unax Ugalde, Kandido Uranga, Joseba Apaolaza, Txema Blasco, Ramon Agirre, Ione Lizartza, Mirentxu Goienetxe.

Euskal Herria. 98 minutu.