Havana Club
Filmeko irudia.
Ron marka famatuak ematen dio hasiera 7 días en La Habana filmari. Azken finean, babesle nagusia da Havana Club, pelikularen 3 milioi euroko aurrekontutik 1 jarri du edari ezagunak. Beharbada arrazoi horregatik parranda, emakumeak eta alkohola dira filmeko osagai nagusiak. Beharbada Parisko M&C Staatchi GAD publizitate agentziak bultzatutako proiektua delako dirudi pelikulak turisten ikuspegitik errodatutako iragarkia. Eta beharbada Habanari buruzko zazpi istorio kontatu dizkiguten zazpi zuzendarietatik bakarra baino ez delako kubatarra da emaitza hain partziala eta murritza.
Turisten parranda-gune izateaz gain, gainbehera dagoen herrialde txiro eta nazkatua irudikatzen du filmak, muturreko erlijiozkotasunari eta erritualei eusten diena. Astea bailitzan, egun bakoitzeko istorio bana osatu dute hainbat herrialdetako zazpi zuzendarik, hari nagusirik eta lotura handiegirik gabeko zazpi istorio. Desorekatua da emaitza, eta oro har maila hobea espero zitekeen zinegile hauengandik. Emir Kusturica zuzendari serbiarra bere burua parodiatuz ikustea da seguruenik zatirik dibertigarrienetakoa. Gutxien gustatu zaidana berriz, azkenaldian finegi ez dabilen Julio Medemek zuzendutako kapitulua: kulebroi latinoamerikarra bailitzan, irrigarria da Espainiatik etorritako enpresariaren eta mutil-lagun kubatarraren artean hautatu behar duen emakumearen pasadizoa.
Pelikulak badu une distiratsurik, musika oso presente dago eta sarri erritmo kubatarrek salbatzen dute planoa, baina oro har zuku gehiago atera ziezaioketen Habanari, hiriko paisaiari, jendeari, aniztasunari… ohiko klixeetara mugatu beharrean.
ZABALTEGI SAILA
7 días en La Habana
Zuzendariak: Benicio del Toro, Pablo Trapero, Elia Suleiman, Julio Medem, Gapar Noé, Juan Carlos Tabío, Laurent Cantent.
Gidoilariak: Leonardo Padura, Lucía López Coll.
Espainia-Frantzia. 129 minutu.
Iruzkinik ez
Trackbacks/Pingbacks