Nerabe frustratuak ez du hazi nahi

Atalak: Zinema, Zinemaldia 2012

Protagonista eta bere pelutxezko hartza.

Haurtzarotik heldutasunerako bidaia konplexua makina bat aldiz irudikatu du zinemak, eta estereotipoekin jokatuz egin du maiz: institutua oihana bailitzan telesail estatubatuarrek –eta ez estatubatuarrek– deskribaturiko nerabe hormonatu eta burugabeetara ohituta gaude, baita munduarekin haserre dauden errebelde inkonformistetara, beren lekua aurkitzen ez duten gazteetara… Marçal Forés katalanak ere sasoi korapilatsu horri heldu dio Animals filmean, eta topiko indie eta alternatiboetatik edan du, baina aldi berean gai izan da mundu bitxi eta pertsonala eraikitzeko.

Pol heldua da kasik, baina ez dio ume izateari utzi nahi eta horregatik egiten zaio hain zaila pelutxezko hartza betiko zokoratzea. Azken finean, sentimendu kontrajarriz, sexu grina kontrolagaitzaz, sekretuz, tentsioz eta arrisku ezezagunez betetako mundua da helduena. Zalantzak, zalantzak eta zalantza gehiago. Eta aurrera egiteko beldurra eta ausardia aurrez aurre; noraino iristeko gai da Pol? Bide nahasi horretan, irudimena du lagun eta babes nagusi, eta errealitatearekin bat egiten duen mundu imaginario horretara jausten gaitu zuzendariak.

Pertsonaiengan nerabe frustratuaren arketipoa nabaria bada ere, kutsu surrealista duen unibertso berezkoa sortu du Forések. Bere hitzetan, oso eremu estuan mugitu da, segituan zatarra eta absurdoa izateko arriskupean, dramatikoegia batzuetan. Eta antzematen da, batzuetan ez baita erraza fantasiaz betetako unibertso horretan sartzea; batzuetan ilunegia da Forésen unibertsoa, tragikoegia. Eta hala ere, errealitatearen mugak gainditu eta txakur beldurgarriz, ziurgabetasunez eta heriotza usainez betetako basoan murgiltzeko prest dagoenak proposamen ausarta eta interesgarria aurkituko du.

Filmari buruz Argian elkarrizketa egin diogu Marçal Forés zuzendariari.

ZUZENDARI BERRIAK SAILA

Animals

Zuzendaria: Marçal Forés

Gidoilariak: Marçal Forés, Enric Pardo, Aintza Serra

Aktoreak: Oriol Pla, Augustus Prew, Dimitri Leonidas, Roser Tapias, Javier Beltrán

Katalunia, 94 minutu.