Israelen erradiografia laburra

Atalak: Nazioartea

Handia da ultraortodoxoek Israelen duten boterea / Irantzu Pastor

Israelgo gizartearen erretratu gordina egiten du Alberto Pradilla kazetariak El judío errado (2010) liburuan. Bere garaian Pradillari egindako elkarrizketan, Israelgo Estatuaren oinarrian dauden ezaugarriez mintzatu zitzaigun. Hona, bere hitzak berreskuratuz, ezaugarri horien zerrenda laburra, Ekialde Hurbilean bizirik dagoen gatazkaren argigarri.

Estatu zatikatua. “Mundu guztitik etorritako juduen immigrazioa bultzatu da Israelen eta horrek ezberdintasun sozial handiak sortu ditu: elite europarra batetik; herrialde arabiarretatik iritsitakoak, bigarren maila batean; eta are baztertuago, hirugarren mailan, Etiopiatik heldutako juduak. Laiko eta erlijiosoen artean ere zatiketa handia dago”.

Estatu erlijiosoa. Handia da erlijioak eta ultraortodoxoek Israelen duten boterea. “Estatua babesteko erlijiosoen laguntza behar du Israelek eta horregatik hainbat eskakizun onartu zaizkie, pribilejioak dituzte eta euren boterea indartu dute, erlijiosoak beti dira beharrezkoak gobernua osatzeko garaian”.

Estatu baztertzailea. Estatu demokratiko eta judua, hala definitzen du bere burua Israelek. Estatu judua –eta soilik judua– izatearen ondorioz, judu ez direnak baztertzen ditu (milioi eta erdi palestinar bizi dira Israelen). “Apartheid garaiko Hego Afrika zuriaren parekoa da, ez da onargarria, onargarria ez litzatekeen moduan begi urdindunen Estatu bat, edo ilehorien Estatua”.

Biktimismoa instrumentalizatzen duen Estatua. Israelek lortu du Estatuari egiten zaion edozein kritika zuzenean antisemitismoarekin lotzea. “Horrek estigmatizatu egiten du edozein disidentzia, edozein kritika”.

Estatu kolonizatzailea. “Saldu nahi digute israeldar-palestinar gatazkan bi alderdi edo borrokalari daudela, eta ahazten dugu gatazkaren benetako jatorria zein den: Europako juduek erabaki zutela juduentzat baino ez den Estatua eraikitzea, bertako herritarrak kanporatuz”. Areago, “Israelgo makinaria ekonomikoa eta hazkundea kolonizazioan oinarritzen da. Hainbeste barne ezberdintasun dituen Estatuaren kohesioa mantentzeko ere baliagarria da palestinarren aurkako borroka”.

Estatu militarizatua. Segurtasunarekin obsesionatuta, gizarte erabat militarizatua da Israel, “hein batean herritar guztiek hiru urte ematen dituztelako armadan, eta erakunde horren ikuspegia barneratzen dute. Israelgo lider asko militarrak izan dira aurretik”. Segurtasunaren industria, gainera, puntako arloa da Israelen.