Isiltasun konplizea ala isiltasun eraginkorra?

Atalak: Hezkuntza

Gaur eraman behar zuten LOMCE legea Espainiako Ministro-Kontseilura, hezkuntza erreforma polemikoari buruzko eztabaida parlamentuan abiatzeko. Azkenean atzeratu egin dute eguna, baina gaiaz aritu nintzen atzo irakasle birekin eta kezkatuta zeuden, Cristina Uriarte Eusko Jaurlaritzako Hezkuntza sailburuaren isiltasunaz mesfidati.

LOMCE lege-proposamenaren aurkako manifestazioa.

Erreformak EAEk dituen hezkuntza eskuduntzak urratzen dituela edota euskararen estatusaren kontra egiten duela esana du sailburuak, lege-proiektuak “hainbat akats” dituela. Erantzun epelegia dela eta irmotasuna falta zaiola iritzi diote irakasleok, apenas mintzatu dela gaiaz, apenas salatu dituela Madrildik datozen asmoak hedabideetan eta arloko eragileekin. Isilegi dagoela uste dute, eta Wertekin negoziazio jokoan sartu beharrean, ozen esan beharko liokeela ezetz LOMCEri, Kataluniako Gobernuak egin duen moduan, lege-proposamena bere osotasunean deskalabru pedagogikoa delako.

Cristina Uriartek aldiz, eraginkortasunaren izenean defendatu zigun Argian bere jarrera: “Erreforma ez zaigula batere gustatzen argi utzi ondoren, hitz egiteko eta ikuspuntuak hurbiltzeko momentua da eta ahalegin horretan aritu gara orain arte, nahiz eta batzuek gure jarrera kritikatu. Hurrengo eszenatokia Madrilgo parlamentua dugu. Eta bertan ere, nahitaez, LOMCEren edukiaren inguruan eztabaidatu beharko dugu, gustatzen ez zaiguna salatuz eta gure argudioen alde eginez. Arduragabekeria litzateke mahaitik jaiki eta Madrilgo Gobernuak bere gehiengo absolutuarekin egiten duenaren zain geratzea. Gure interesak defendatzen jarraitu beharrean gaude, eta horretarako, hitza erabili behar dugu”.

Bitartean, ezari-ezarian erreforma ari da aurrera egiten, eta halako burugabekeriaren aurrean politikariak bakarrik ez, hezkuntza eragile guztiak, irakasle, guraso eta ikasleak, gizartea oro har, ozen mintzatu beharko litzateke, urtetako lanaren ondorio den hezkuntza eredu propioa aldarrikatu eta LOMCE arbuiatzeko.

LOMCEren erradiografia egin genuen Wert erreforma: Deskalabru pedagogikoa erreportajean.