Hamar gomendio zinematografiko, Sail Ofizialetik harago

Atalak: Zinemaldia 2013

Sail Ofizialetik harago bada bizitzarik Donostiako Zinemaldian (Sail Ofizialerako aholkuak nahi izanez gero, ikusi Gorka Bereziartua lankidearenak). Hona zine aretoan sartzeko hamar gomendio, Zabaltegi, Zinemira eta Zuzendari Berriak sailak arakatu ostean.

La vie d’Adèle-Chapitre 1&2
Polemikak polemika, komiki batean oinarritutako film honek Urrezko Palmorria eskuratu du Cannesen eta nazioarteko kritikariek ematen duten FIPRESCI saria irabazi du. Horiek badira nahikoa arrazoi, bi nesken arteko desio eta pasio istorioa kontatzen duen pelikula ikusteko.

Soshite chichi ni naru (Like father, like son)
Aurretik ere Donostian izana da Hirokazu Kore-eda zuzendari japoniarra eta Cannesen harrera ona izan duen pelikula batekin dator oraingoan. Protagonista, bere bizitza aldatuko duen erabaki bat hartu beharrean dago: seme naturalarekin geratu, ala berea zelakoan sei urtez hezi duen alabarekin.

Gravity
Children of men ezaguna errodatu zuen Alfonso Cuarón mexikarrak ingeniari baten eta astronauta esperientziadunaren ibilaldi espaziala du oraingoan kontakizun. George Clooney eta sinpatia gehiegi sortzen ez didan Sandra Bullock ditu protagonista, baina kritika oso baikorrak jaso ditu orain arte.

Pozitia copilului (Child’s pose)
Berlingo Urrezko Hartza film errumaniar honentzat izan da aurten. Semea kartzelara joan ez dadin, bere trebezia eta diru guztia erabiliko du emakume protagonistak. Baina, sinopsiak dioen moduan, non dago ama baten maitasuna eta manipulazio egozentrikoa bereizten dituen lerro lausoa?

Jeune et Jolie
Iaz Urrezko Maskorra lortu zuen François Ozonen Dans la maison gustatu bazitzaizun, jakin gure artean izango dugula berriz ere zuzendari frantziarra. 17 urteko neska baten erretratua aurkeztuko digu oraingoan, lau urtarotan eta lau abestitan gauzatua.

Fruitvale station
Sundancen eta Cannesen harrera oso ona izan ostean, Donostian izango da Ryan Coogler zuzendariaren azken filma: San Frantziskon bizi den 22 urteko gaztearen bidea lagunekin, etsaiekin, senitartekoekin eta ezezagunekin gurutzatuko da 2008ko azken egunean, dio sinopsiak.

L’image manquante
Rithy Panh zuzendari kanbodiarrak bere herrialdeko historia hartu du mintzagai dokumental honetan. Panhen hitzetan, “urte luzez ibili naiz galdutako irudi baten bila: Kanbodiako gobernuan zeuden Khmer Gorriek 1975 eta 1979 urteen artean eginiko argazkia. Alferrik bilatu dut, eta orain badakit irudi hori galduta dagoela; beraz, sortu egin dut”. Cannesen Un Certain Regard saria irabazi izanak bermea ematen dio lanari.

Cutie and the boxer
Zachary Heinzerling zuzendari estatubatuarrak bere bigarren dokumentala eskainiko du Zinemaldian: Tokioko Ushio Shinohara margolari-boxeolariaren eta Noriko artistaren arteko 40 urteko ezkon bizitza du ardatz eta amodioari, sakrifizioari eta sormen-espirituari buruzko gogoeta da. Dokumental zuzendari onenaren saria irabazi zuen Sundanceko jaialdian.

Amaren eskuak
Barrura begiratzeko leihoak dokumentalean parte hartu ondoren, Mireia Gabilondo zuzendariak Karmele Jaioren liburua ekarri du pantaila handira. Fikziozko euskal film luze bakarra da aurten Zinemaldian eta Nerea eta memoria galtzen ari delako ospitalera eraman duten haren ama ditu protagonista.

Asier ETA biok
Aitor Merino zuzendari iruindarrak bigarren dokumentala du hau, Goya sarietarako hautagai izan zen El pan nuestro filmaren ostean. Asier Aranguren preso politiko ohiaren eta Aitor Merino beraren arteko laguntasuna da filmaren oinarria. ETAz eta euskal gatazkaz mintzo dira protagonistak, bakoitza bere ikuspegitik.