Bizitzaren etapa berriez gozatzeko prest

Atalak: Zinemaldia 2013

“Egunero egiten dudan guztia egiten dut zahartzaroan bakarrik ez egoteko”, esan zidan duela gutxi Campanella zuzendariak. Zaharra ez, baina heldua da Gloria, eta bakarrik dago. Eta okerragoa dena: bakarrik sentitzen da. Bakardadea dario Gloria pelikulari, maitasun gosea, kariño egarria, baina batez ere, bizitzaren etapa berri batera egokitzeko abentura zaila kontatzen digu film txiletar honek.

Bere lekua bilatu nahian ari da Gloria.

Gloriak 58 urte ditu eta bananduta dago. Semeak ez dio telefonoz deitzen, alabak ere ez, euren bizimodua dute jada, eta berea propioa berregin nahi du Gloriak. Ez du harreman berriak egiteko zailtasunik, dantza egitea gustatzen zaio eta konpainia egingo dion gizonezkoa ari da bilatzen. Aurkitu duela dirudienean, ordea, harremana ez da berak nahi bezala garatuko. Familia loturak/desloturak, zahartzaroaren atariko beldur eta erronkak, norbere lekua aurkitzeko ahalegina modu sinesgarri errealistan landu ditu Sebastián Leilo zuzendariak. Ez du aurretik zineman ikusi ez dugun gairik jorratu, baina pertsonalitate indartsu eta intentsuko emakume baten erretratu gazi-gozoa oparitu digu, seme-alabak etxetik alde egitean bizitza ez dela inolaz ere bukatzen eta helduaroan gozatzen jarraitzeko prest dagoela erakutsi nahi duen emakumea.

Pertsonaia hori, gainera, primeran antzeztu du Paulina Garciak, eta lan honengatik emakumezko aktore onenaren Zilarrezko Hartza irabazi zuen Berlinen. Amaieran soberako metrajea du agian, baina bi lezio interesgarri jaso ditugu bederen: musika kitch-a maite dute Txilen, eta paintball-eko pistolak tresna ezin hobea dira maitale ohien aurka mendekua hartzeko.

ZABALTEGI PERLAK

Gloria

Zuzendaria eta gidoilaria: Sebastián Leilo

Aktoreak: Paulina García, Sergio Hernández, Coca Guazzini, Antonia Santa María.

Txile-Espainia, 109 minutu.