Biolentzia, biolentzia, biolentzia

Atalak: Zinemaldia 2013

Eta biolentzia gehiago. Biolentziak inguratzen gaitu, biolentoak gara. Hala berresten dute albistegiek, eguneroko gertakariek. Zinemak, baita aurtengo Zinemaldiak ere, zeharka edo zuzenean pelikula ugaritan jorratu du gaia. Dagoeneko saturatuta gaude, anestesiatuta, lobotomizatuta kasik, baina film batzuk oraindik ere gai dira zaplazteko baten moduan ikuslea esnarazteko, muturreko baten gisan inpaktatzeko, ostikada batek bezala astintzeko. Horietako bat da A touch of sin txinatarra.

Lau istorioetatik lehenengoa da basatiena eta indartsuena.

Basatia, krudela, mingarria da filma, eta aldi berean txundigarria, erakargarria, primitiboa, indarkeria bera bezalaxe. Lau istorio independente kontatu ditu zuzendariak, eta lehena da bortitzena eta potenteena. Oso goian hasten da filma, baina maila ematen dute gainerako istorioek ere, eta Cannesen gidoi onenaren saria eskuratu zuen lan honek publikoa bi ordu eta erdiz adi mantentzea lortzen du. Intentsitate baxuko indarkeriatik muturrekoeneraino (Quentin Tarantino edo pelikula txinatar-japoniar odoltsuak gogorarazi dizkidate hainbat eszenek), tiro asko entzun eta ikusiko dugu pelikulan, eskopetaz nahiz pistolaz, baita labainkadak ere, bultzadak, ostikadak, zartakoak, irainak, bortxak, suizidioak… mendeku goseak eraginda, edo gorrotoak, dibertitzeko gogoak, etsipenak, grinak, ohiturak, beharrak. Txinan eguneroko ogi bihurtu den indarkeria azaleratzen du zuzendariak, eta horren bidez, gizakion miseriak eta biolentziarekin dugun harreman estua mahaigaineratzen ditu. Zerk bultzatzen gaitu min ematera? Zergatik biolentziarekiko halako lilura? Non dago muga?

Esan bezala, Zinemaldian ugari dira indarkeriaz mintzo diren filmak eta merezi du horietako bi aipatzea. Narco Cultura dokumentala, narkotrafikatzaile izan nahi duten gaztetxo mexikarren bitartez ongi islatzen duelako zer den boterea eta arrakastaren gailurra: ondoriorik jasan gabe norbait garbitu ahal izatea. Eta Luton greziarra, film luzeegia eta nekosoa izan arren, herrialde hartan faxismoak izan duen gorakadaren iturburuan hatza bikain sartzen duelako: euren barne frustrazioak estaltzeko “jipoitzea merezi duen jendea” erasotzen dute protagonistek.

ZABALTEGI PERLAK

Tian zhu ding / A touch of sin

Zuzendaria eta gidoilaria: Jia Zhangke

Aktoreak: Jiang Wu, Li Meng, Luo Lanshan, Wang Baoquiang

Txina-Japonia, 143 minutu.