Probokazio gazte eder sotila
Gaztea eta ederra da Jeune et jolie filmeko protagonista. Ez du premia ekonomikorik, ez familia arazorik, ez txikitako traumarik. Orduan, zergatik? Zergatik erabaki du 17 urterekin prostituitzea? Beharbada horrexegatik, bizimodu burgesak sortzen dion asperduragatik, nerabezaroak berarekin dakarren transgresio eta probokazio desioagatik. Isabellerentzat jolas bat baita prostituzioa, arriskutsu bilakatu daitekeen jolasa.
Isabelle, 17 urteko gaztea da “Jeune et Jolie” filmeko protagonista.
Ikaskideek udako maitasun istorio idilikoekin amesten duten bitartean, diru truke gizon helduekin oheratzen da Isabelle; sentsazio berriak esperimentatzeko balio dion bizimodu paraleloa darama. Ezkutukoa azalera irteten denean ere, ez dio gertatutakoari garrantzi berezirik emango, amak ezer ulertuko ez duen arren. Nazka emango dio bere alabak, “zer egin dugu gaizki?”. Bazkalosteko telefilmean erortzeko arriskua saihestea lortzen du François Ozon zuzendariaren arteak: kontakizuna ez da dramatismoaz, emozio hanpatuez eta gatazka efektistez baliatzen, transgresioa sotila ere izan daitekeelako, delikatua, ederra. Eta halaxe, estetika zainduz, natural, erritmo, irudi eta plano atseginez egingo du aurrera filmak; naturaltasun berarekin apurtuko ditu mugak protagonistak. Utikan moralismo, lezio eta mezu merkeak, halakorik ez dago Ozonen filmean.
Iaz Dans la maison lanari esker Urrezko Maskorra irabazi zuen zuzendari frantziarrak Donostian; azken pelikulak berriz, iritzi kontrajarriak eragin ditu Cannesen. Buñuelen Belle de jour filmarekin konparatu dute, hartan ere prostituzioa libreki egindako aukera izan daitekeela azpimarratzen baizen, arrazoia zernahi dela ere. Catherine Deneuve zuen protagonista Belle de jour-ek, eta Marine Vacth Jeune et jolie-k. Gaztea eta ederra izateaz gain, kamera bereganatzeko eta ingurukoak eta ikuslea bera hipnotizatzeko gai da Vacth. Berak darama istorioaren pisu guztia, eta kontakizunak eskatzen duen tonu berean darama, sotil, fin, jolasean ariko bailitzan, jolas arriskutsu asaldagarri batean.
ZABALTEGI PERLAK
Jeune et jolie
Zuzendaria eta gidoilaria: François Ozon.
Aktoreak: Marine Vacth, Géraldine Pailhas, Fréderic Pierrot, Fantin Ravat
Frantzia, 95 minutu.
ederra pelikula!