Koktel indartsua

Atalak: Zinemaldia 2013

Generoak nahastea ez da erraza eta beti ez da ongi ateratzen, baina filma gai denean thriller trebe bat drama garratz batekin naturaltasunez uztartzeko, gai denean koktelera berean eskaintzeko suspentsea, tentsioa eta korapilatzen den trama batetik, sufrimendua, giza ahulguneak eta dilema moral eta etikoak bestetik, oso ona da emaitza: Prisoners.

Itzel daude Gyllenhaal eta Jackman, pelikulako protagonistak.

Seven eta Mystic River pelikulekin konparatu dute Denis Villeneuve zuzendariaren azken lana, ez alferrik. Gustuko izan bazenituen, pantaila aurrean adi mantenduko zaitu honek ere. Hainbeste film eta telesail amerikarretan ikusi dugun Thanksgiving Day edo Esker emate Egunean, bi neskato desagertuko dira herrixka batean, bahitu egin dituzte. Horietako baten aitak (Hugh Jackman), alkoholiko ohi eta kristau fededun amorratuak, bere kabuz abiatuko du ikerketa lana, poliziak (Jake Gyllenhaal) ez duela nahikoa egiten sinetsita. Inbestigazio paraleloak jarraituko ditu ikusleak, bata justiziaren eta legalitatearen barnean, bestea alaba galdu duen aita baten eskuetan. Aita hori noraino iristeko prest dagoen, zer egiteko eskubidea duen eta mugak non dauden/nork jartzen dituen, pelikulak ikusleari planteatzen dizkion gaiak dira, baita horrelako gertaera batek familia barnean sortzen duen drama, norberaren baitan eragiten duen barne-gatazka, fede oneko pertsona izatetik gizatxar bihurtzera dagoen bide laburra. Eta horrekin guztiarekin batera, aldrebesten eta bidegurutze berriak hartzen doan trama dugu, ezusteko pare bat tarteko, thriller iaioenen gisan.

Pelikula indartsu bihurtzen duen faktore garrantzitsuetako bat aktoreen lan bikaina da. Gustatu zait Hugh Jackman, etsipenaren eta esperantza eroaren artean mugitzen den aitaren rolean, eta are gehiago gustatu zait Jake Gyllenhaal, begietan tika duen detektibe zorrotz, zurrun eta zuzenaren paperean. Donostia Saria jasotzera pelikula egokiarekin etorri da Jackman.

DONOSTIA SARIA – EMANALDI BEREZIA

Prisoners

Zuzendaria: Denis Villeneuve

Gidoilaria: Aaron Guzikowski

Aktoreak: Hugh Jackman, Jake Gyllenhaal, Maria Bello, Terrence Howard, Viola Davis, Melissa Leo, Paul Dano

AEB, 146 minutu