Bertako eta nazioarteko zinema, Hendaia Film Festivalen

Atalak: Zinema

Film luze nahiz labur, dokumental, fikzio eta animazio, denetarik eskainiko dute urriaren 17tik 19ra Hendaiako Les Variétés aretoan. Hendaia Film Festival jaialdiak lehenengo edizioa du hau eta euskal zinema, euskarazko zinema, Ipar Euskal Herrian ikusteko erraztasunak ematea da helburuetako bat.

Euskal zinemak Iparraldean duen hedapenari –hedapen ezari- buruzko bilkura egingo dute.

Hala, Euskal Kultur Erakundeak eta Hendaiako Begiradak elkarteak antolatuta, euskal zinemak Iparraldean duen hedapenari –hedapen ezari– buruzko bilkura egingo dute urriaren 18an, herriko Mendi Zolan gelan. “Iparraldeko ikusleen eskaera gero eta handiagoa izanik ere, oztopoak badira euskal zinea gure lurraldeko pantaila ezberdinetan hedatzeko, besteak beste horrendako hedapen egiturarik ez delako. Ondorioz, emanaldi bakan eta sakabanatuak egiten dira, eta filmen ustiatzea eskasa gelditzen da film egile, ekoizle, ustiatzaile eta ikusleentzat”. Horri konponbidea nola eman eztabaidatuko dute, eta tartean izango dira Pirinio Atlantikoetako Kontseilu Orokorra, ECLA (idatziaren eta irudiaren eskualdeko agentzia), Hegoaldeko banatzaileak eta Iparraldeko zine ustiatzaileak.

Nazioarteko lehiaketan, About Ndugu, The big willow, Miniyamba, Felici, Vikingar, Bella B., Bost litro, Le dernière caravane, Matilde, Leyla, Filmmaker, Les deux morts de parfait, Corse, Se taire eta Studio Beyrouth proiektatuko dituzte. Eduardo Manet kubatarra izango da epaimahaiburu.

Akitania-Euskadi deitu duten sailean berriz, aukera izango da Euskal Herriko filmak ikusteko. Tartean, Deus et machina (Koldo Almandoz), Abuztua (Pello Gutierrez), Walkie Talkie (Ruben Perez), Elkartea (Kote Camacho), Hamaiketakoa (Telmo Esnal), Hibernation (Jon Mikel Caballero) edota Zomorroak (Lander Garro).

Klausuran, Jacques Abeberry abertzale historikoari buruzko Sur les pas de Jakes dokumentala emango dute, eta zinemaz gain, literaturak, argazkigintzak eta bestelako kultur arloek ere izango dute tokirik. Elkartrukerako “giro goxo eta sortzailea” izan nahi du jaialdiak, “begiradak gurutzatzea, munduaren kontakizunak eta ikuspuntuak biderkatzea, zubiak eta harremanak sortzea derrigorrezkoa delako guretzat”.