Kultura zerbezaren truke. Bi kultur eredu eta proposamen bat

Atalak: Kulturgintza

Astebeteko epean, hiru kultur ekitaldi ikusi ahal izan ditut Irungo Kabigorri Ateneoan: musika eta poesia uztartzen dituen performance bat, bakarrizketa antzeztu bat eta bertso saio bat. Irungo Amaia Antzokira, aldiz, aspaldi ez naizela gerturatu.

Hilero bertso saioa antolatzen dute Kabigorrin.

Formatu txikiko eskaintzak dira Kabigorrikoak, anitzak (kontzertuak, antzezlanak, irakurraldiak, hitzaldiak…), maiztasun handikoak eta doakoak, eta lagun ugari bertaratu ohi da (jendez lepo zegoen bertso saioan). Aldi berean ateneoa eta taberna den proiektu hau aurrera ateratzeko bazkideak dituzte eta edonork parte har dezakeen batzar irekietan erabakitzen dute zer antolatu. Sarri, inguruko herri mugimendu eta elkarteak dira antolatzaileak (tartean Irun Iruten euskara elkartea, Irungo Bilgune Feminista, Antxeta Irratia edota Irunabar bertso eskola), eta Kabigorrik eszenatokia eta baldintza egokiak jartzen ditu.

Irungo Udalaren azpiegitura den kultur zentroan, Amaia Antzokian alegia, formatu handiagoko ekitaldiak dira nagusi, euskarazko eskaintza hutsaren hurrengoa da (formatu handiko euskarazko antzezlanen bat ikusteko, zuzenean Hondarribiko Itsas Etxea Auditoriumera joaten gara), maiztasun urrikoak eta ordainduak dira, eta zaila da jendez betetzea, areto handia baita. Hala ere, antzoki dotore horrekin aski ez eta hirigunean auditorio bat behar dela iritzi dio Udalak. Eskerrak krisiari, ez dirudi halakorik aurrera aterako denik. Ezin ahaztu Ficoba ere dugunik Irunen, baina azpiegitura erraldoien garaiko mamotreto honek duen kultur (?) irizpide eta eskaintzak post bereizia mereziko luke.

Errealitatea zera da: Kabigorrin bizi-bizi dagoela kultura, eta Amaian hotza dela asteroko martxa. Ateneoak funtzionatzen du eta funtzionatzen duen kultur eredu jasangarria babestu eta lagundu beharko luke Udalak. Izan ere, Itxaro Bordak berak Kabigorriz esandakoa gogoratuz, poesiak –kulturak, gaineratuko nuke nik– “horrelako plazak premiazkoak ditu”. Bazkide ez garenok, ikuskizunaz gozatu bitartean bertako barran kañak eskatzen jarraituko dugu, gure ekarpen txikia egin nahian.